Qazaqstan men Aýǵanstan saýda-ekonomıkalyq yntymaqtastyqty nyǵaıtady
ASTANA. KAZINFORM – Memleket basshysy Aýǵanstan ónerkásip jáne saýda mınıstriniń mindetin atqarýshy Nýrıddın Azızıdi qabyldady, dep habarlaıdy Aqordanyń baspasóz qyzmeti.
Kezdesýde Qasym-Jomart Toqaev Qazaqstan Aýǵanstandy aımaqtaǵy mańyzdy seriktes retinde qarastyratynyn jáne eki el arasynda senim men yntymaqtastyqty odan ári nyǵaıtýǵa nıetti ekenin atap ótti. Memleket basshysynyń aıtýynsha, elimiz Aýǵanstanda ornyqtylyq pen qaýipsizdiktiń ornaýyna múddeli. Bul aımaqtyń ıgiligi jolynda aýǵan memleketiniń áleýetin paıdalanýǵa múmkindik beredi.
Ózara baılanystardy qalpyna keltirý maqsatynda Qazaqstannyń úkimettik delegatsııasy Kabýlǵa eki ret bardy.
Nýrıddın Azızı Qazaqstannyń halyqaralyq uıymdarda Aýǵanstan taqyrybyn dáıekti túrde ilgeriletip kele jatqany jáne gýmanıtarlyq kómek kórsetkeni úshin rızashylyq bildirdi. Ol resmı Kabýldyń birlesken jobalardy júzege asyrýǵa qyzyǵýshylyq tanytatynyn jetkizdi. Bul Aýǵanstanda jumys oryndaryn qurýǵa múmkindik beredi.
Áńgimelesý barysynda saýda-ekonomıkalyq, kólik-logıstıkalyq jáne agrarlyq salalardaǵy, sondaı-aq geologııalyq barlaý men tsıfrlandyrý baǵyttaryndaǵy yntymaqtastyqtyń perspektıvasy talqylandy. Qazaqstan kompanııalary aýǵan aýmaǵyndaǵy iri ınfraqurylymdyq jobalarǵa qatysýǵa daıyn.
Qazirgi kezde Týrgýndı – Gerat temir jol qurylysy salynyp jatyr. Sonymen qatar Qazaqstannyń Aýǵanstanǵa aýyl sharýashylyǵy ónimderi men hımııa ónerkásibi taýarlarynyń eksportyn ulǵaıtýǵa múmkindigi zor.
Osyǵan deıin Memleket basshysy Mıgratsııa jónindegi halyqaralyq uıymnyń bas dırektorymen kezdeskenin jazǵanbyz.