Qazaqstan men Aýǵanstan saýda aınalymyn $3 mlrd-qa jetkizýdi kózdep otyr
ASTANA. KAZINFORM - Búgin Kabýlda Qazaqstan Premer-mınıstriniń orynbasary - ulttyq ekonomıka mınıstri Serik Jumanǵarın men Aýǵanstannyń ónerkásip jáne saýda mınıstri Hadjy Nýrıddın Azızı jyl saıynǵy Qazaqstan-Aýǵanstan bıznes forýmyn ashty, dep habarlaıdy Úkimettiń baspasóz qyzmeti.
Bul joly forým Kabýlda ótti. Forýmǵa agroónerkásip kesheni, tehnologııa, mashına jasaý, hımııa ónerkásibi men IT salasyndaǵy 50-den asa kompanııa, memlekettik jáne kvazımemlekettik sektor ókilderi qatysýda.
2025 jyldyń qorytyndysy boıynsha ekijaqty saýda kólemi $541,8 mln-dy qurady. Saýda-ekonomıkalyq qatynastardy odan ári damytý maqsatynda saýda aınalymyn qysqa merzimde $3 mkrd-qa jetkizý mindeti tur.
Qazaqstan Aýǵanstandy strategııalyq áriptes jáne ońtústik jáne Ortalyq Azııa óńiriniń negizgi logıstıkalyq haby retinde qarastyrady. Aǵymdaǵy yntymaqtastyq sheńberinde jetkizilimderdiń taýar nomenklatýralaryn keńeıtý, ınvestıtsııalar úshin jaǵdaılar jasaý, logıstıkalyq jáne sertıfıkattyq kedergilerdi joıý, bıznes pen elektrondyq saýda alańdary arasyndaǵy tikeleı baılanystardy damytý josparlanýda.
-Bizdiń tarapymyzdan biz aýǵandyq áriptesterimizge astyq, un, maıly daqyl, qurylys materıaldary, dári-dármek, ónerkásiptik jabdyq jáne basqa da suranysqa ıe taýar jetkizýdiń básekelestik jaǵdaıyn qamtamasyz etýge daıynbyz. Bul rette Qazaqstan eksportqa ǵana emes, sonymen qatar Aýǵanstan aýmaǵynda, ásirese tamaq ónerkásibi, aýyl sharýashylyǵy ónimderin qaıta óńdeý jáne toqyma sııaqty salalarda birlesken óndiristerdi iske asyrýǵa múddeli, — dep atap ótti Serik Jumanǵarın óz sózinde.
Bıznes ókilderi mundaı bıznes-forýmdar aıtarlyqtaı marketıngtik áser etetinin atap ótti. Olardyń aıtýynsha, kompanııalardyń resmı delegatsııalardyń saparlaryna qatysýy sheteldik áriptester tarapynan senim deńgeıin arttyryp, iskerlik baılanystardy damytýǵa yqpal etedi.
- Biz alǵash ret 2023 jyly osy alańda ótken bıznes-forýmǵa qatystyq. Osy sátten bastap kúnbaǵys maıyn jetkizý kóbeıe bastady. Eger 2022-2023 jyldardaǵy maýsymdardy salystyratyn bolsaq, jetkizilim kólemi 17 myń tonna. Aǵymdaǵy maýsymda 75 myń tonnaǵa jetti. Úsh maýsymda biz jetkizilim kólemin tórt eseden asa arttyrdyq. Kelesi maýsymdaǵy bizdiń kelesi mindetimiz-kúnbaǵys maıyn jetkizýdi 110-120 myń tonnaǵa jetkizý, — dep atap ótti Qazaqstannyń maı salasy qaýymdastyǵynyń tóraǵasy ıAdykar Ibragımov.
Qazaqstan-aýǵan bıznes-forýmy barysynda Serik Jumanǵarın Aýǵan tarapyna «BARK Technology» qazaqstandyq kompanııasynyń biregeı ınnovatsııalyq ázirlemesin - «BARK VibroLUNG» ókpe vıbroakýstıkalyq terapııasynyń medıtsınalyq apparatyn syıǵa tartty.
Apparat vıbroakýstıkalyq áser etý arqyly tynys alý júıesiniń jumysyn jaqsartýǵa jáne tynys alý joldaryn tazartýǵa arnalǵan. Tehnologııa medıtsınalyq kómektiń sapasy men qoljetimdiligin arttyrýǵa yqpal ete otyryp, tynys alý organdarynyń syrqaty bar patsıentterdi keshendi terapııa men ońaltýda tıimdi qoldanyla alady.
Sondaı-aq, forým alańynda «Konsung Technology» JShS qazaqstandyq kompanııasy óndiretin HES-7 júıesimen jabdyqtalǵan mobıldi dıagnostıkalyq keshen tanystyryldy. JI kómegimen HES-7 júıesi EKG jáne fýnktsıonaldy dıagnostıka júrgizýge, júrek-qan tamyrlary júıesiniń, baýyrdyń, búırektiń, qan men ókpeniń aýrýlaryn anyqtaýǵa, qant dıabetin dıagnostıkalaýǵa, zerthanalyq ekspress-taldaýlar júrgizýge jáne emdeýdi jedel taǵaıyndaýǵa múmkindik beredi. Bıznes-forýmnyń qorytyndysy boıynsha Aýǵanstanǵa $45 mln somasyna osy mobıldi jabdyqtyń 4500 birligin jetkizý kelisimine qol qoıylmaq.
Aıta keteıik, osyǵan deıin Qazaqstan Aýǵanstanǵa 319 tonna gýmanıtarlyq kómek pen dárigerler tobyn jiberdi.
