Qazaqstan men Aýǵanstan birlesken ınfraqurylymdyq jobalardy jandandyrýǵa ýaǵdalasty
KABÝL. KAZINFORM -Aýǵanstanǵa sapary aıasynda Qazaqstan Premer-mınıstriniń orynbasary – Syrtqy ister mınıstri Murat Nurtileý Aýǵanstannyń Ónerkásip jáne saýda mınıstriniń mindetin atqarýshy Nýrıddın Azızımen kezdesý ótkizdi.
Kezdesýde temirjol kóligin, aýyl sharýashylyǵyn, tsıfrlyq ınfraqurylymdy, paıdaly qazbalardy óndirýdi damytý jáne ózara saýdany arttyrýdy qosa alǵanda, ózara is-qımyldyń ózekti baǵyttary talqylandy.
QR SІM basshysy eki el arasyndaǵy saýda-ekonomıkalyq yntymaqtastyqtyń aıtarlyqtaı áleýetke ıe ekenin atap ótti. Qazaqstan hımııa ónerkásibi, aýyl sharýashylyǵy, janar-jaǵarmaı materıaldary men mıneraldyq tyńaıtqyshtar ónimderiniń jetkizilimin ulǵaıtý múmkindikterine ıe.
QR Syrtqy ister mınıstrligi málimetinshe, osyǵan baılanysty saýda-ekonomıkalyq yntymaqtastyqty damytý jónindegi qol qoıylǵan «jol kartasyna» sáıkes ekijaqty taýar aınalymyn 3 mlrd AQSh dollaryna deıin jetkizýge degen ortaq umtylys rastaldy.
Infraqurylymdyq jobalarǵa erekshe nazar aýdaryldy. M.Nurtileý qazaqstandyq kompanııalardyń Aýǵanstan aýmaǵyndaǵy iri jobalarǵa qatysýǵa qyzyǵýshylyq bildiretinin jetkizdi. Atap aıtqanda, pákistandyq porttar baǵyty boıynsha júk tasymaldaryn qamtamasyz ete alatyn «Týrgýndı-Gerat» temirjolyn salý máselesi qarastyrylyp jatyr. Osyǵan oraı taraptar eki eldiń beıindi vedomstvolary arasynda tıisti memorandýmǵa qol qoıylǵanyn quptady.
Sondaı-aq Qazaqstannyń aýǵan halqyna azyq-túlik, birinshi kezektegi qajetti taýarlar men dári-dármek jetkizýdi jalǵastyryp, eldegi turaqtylyq pen ornyqtylyqty qoldaý sııaqty gýmanıtarlyq kómek kórsetýge qosqan úlesiniń mańyzy atalyp ótti.
Kezdesý qorytyndysy boıynsha suhbattastar basym salalardaǵy birlesken jobalardy iske asyrý boıynsha mazmundy dıalogty jalǵastyrýǵa, sondaı-aq tıisti memlekettik organdar deńgeıinde tıimdi úılestirýdi qamtamasyz etýge ýaǵdalasty.
Aıta keteıik, Kazinform agenttiginiń analıtıkalyq sholýshysy Aýǵanstanda qandaı ózgerister bolyp jatqanyn, onyń Ortalyq Azııaǵa, ásirese Qazaqstanǵa qalaı áser etetinin sarapshymen talqylap kórdi.