Qazaqstan men Aýǵanstan aýyl sharýashylyq taýar aınalymyn 1 mlrd dollarǵa deıin arttyrmaq — Erbol Tasjúrekov

ALMATY. KAZINFORM — Qazaqstan men Aýǵanstan agroónerkásiptik keshen ónimderiniń taýar aınalymyn eki esege deıin arttyra alady. Bul týraly Aýyl sharýashylyǵy vıtse-mınıstri Erbol Tasjúrekov Almatyda ótip jatqan Qazaqstan-Aýǵanstan bıznes forýmynda aıtty.

Vıtse-mınıstr aýyl sharýashylyǵy salasyndaǵy ekijaqty yntymaqtastyqtyń mańyzdylyǵyn atap ótti.

Onyń aıtýynsha, 2023 jyldyń qorytyndysy boıynsha eki el arasyndaǵy aýyl sharýashylyǵy salasyndaǵy taýar aınalymy 567,5 mln dollar bolǵan. Al, Qazaqstannyń eksporty 547 mln dollarǵa jetti.

Qazaqstan Aýǵanstanǵa negizinen un men bıdaı eksporttaıdy. Bul atalǵan elge joldanatyn eksporttyń 80%-dan astamy.

Óz kezeginde Aýǵanstan Qazaqstanǵa mıneraldy sýlardy, jemister men dámdeýishterdi eksporttaıdy.

Vıtse-mınıstr eki el bıznesiniń tyǵyz yntymaqtastyǵy arqasynda elder aýyl sharýashylyǵy ónimderiniń taýar aınalymyn 1 mıllıard dollarǵa deıin arttyra alatynyn atap ótti.

«Jalpy, Qazaqstan tyńaıtqyshtardyń jáne aýylsharýashylyq ónimderiniń basqa da túrleriniń suranysqa ıe túrlerimen yntymaqtasýǵa jáne jetkizilimmen almasýǵa daıyn. Atap aıtqanda, kondıterlik jáne un ónimderi, ósimdik maılary, sondaı-aq mıneraldy tyńaıtqyshtar, aýyl sharýashylyǵy tehnıkalary. Biz óz kezegimizde halyqtyń suranysyn óteý úshin Aýǵanstannan tsıtrýs, keptirilgen jemister, anar shyryny, dámdeýishter, maqta shıkizaty jáne taǵy basqasyn satyp alýǵa daıynbyz», - dedi E.Tasjúrekov.

Sońǵy jyldary Qazaqstannyń Aýǵanstanǵa bıdaı eksporty qysqardy. 2023 jyly jetkizý kólemi 53%-ǵa azaıyp ketken bolatyn. Osy jyldyń 8 aıynda nebári 69 myń tonna.

Vıtse-mınıstr atap ótkendeı, Qazaqstan logıstıkany jaqsartý jáne jetkizilimderdi arttyrý úshin Beıneý astyq termınalynyń áleýetin paıdalaný arqyly bul jaǵdaıdy túzetýdi josparlap otyr.

Sóziniń sońynda vıtse-mınıstr elder arasyndaǵy tájirıbe almasýdyń mańyzdylyǵyna toqtalyp, Qazaqstannyń Aýǵanstandaǵy egin ónimdiligin arttyrý úshin ozyq tehnologııalarmen almasýǵa daıyn ekenin jetkizdi.

Osyǵan deıin Qazaqstan men Aýǵanstan arasyndaǵy saýda aınalym 330,7 mln dollarǵa jetkeni týraly jazǵan edik.