Qazaqstan men Aýǵanstan arasyndaǵy transshekaralyq tólemder kólemi 140 mlrd teńgege jetti
ASTANA. KAZINFORM — Serik Jumanǵarın Ghazanfar Bank tóraǵasy Muhammed Ismaıl Gazanfarmen kezdesti, dep habarlaıdy Ulttyq ekonomıka mınıstrliginiń baspasóz qyzmeti.
Kezdesý barysynda taraptar Qazaqstan men Aýǵanstan arasyndaǵy qarjylyq-banktik yntymaqtastyqty damytý máselesin talqylady.
Serik Jumanǵarın atap ótkendeı, Qazaqstan Aýǵanstanmen saýda-ekonomıkalyq baılanysty nyǵaıtýǵa zor mán beredi. Ózara saýdanyń odan ári ósýiniń negizgi shartynyń biri eki eldiń sharýashylyq júrgizýshi sýbektileri arasynda esep aıyrysýdyń úzdiksiz júrgizilýin qamtamasyz etetin senimdi jáne ashyq bank ınfraqurylymyn damytý.
— Qazir 23 qazaqstandyq banktiń ekeýi aýǵan bankterimen korrespondenttik qatynastardy qoldaıdy. 2025 jyldyń qorytyndysy boıynsha Qazaqstan men Aýǵanstan arasyndaǵy transshekaralyq tólemder men aqsha qarajatyn aýdarý kólemi 2024 jylmen salystyrǵanda 26%-ǵa ulǵaıyp, 140 mlrd teńgege jetti. Bul rette kórsetilgen kezeńde taýarlar men qyzmetter úshin tólemder kólemi bes esege ósken, — delingen habarlamada.
Taraptar bankter arasyndaǵy korrespondenttik qatynasty keńeıtý, tikeleı bank arnalaryn qurý, transshekaralyq tólemder tetigin jetildirý jáne syrtqy saýda operatsııalaryn qarjylyq súıemeldeý perspektıvalaryn talqylady. Qazir taǵy bir qazaqstandyq bank Ghazanfar Bank-pen korrespondenttik shottar ashý rásiminen ótip jatqany atap ótildi.
Oń dınamıka ózara saýdada da saqtalady. 2026 jylǵy qańtar-sáýirdiń qorytyndysy boıynsha Qazaqstan men Aýǵanstan arasyndaǵy taýar aınalymy $342,4 mln-ǵa jetti, bul 2025 jylǵy uqsas kezeńniń kórsetkishinen 2,3 ese ($150,6 mln) artyq. Negizgi salym eksportpen qamtamasyz etilip, onyń kólemi $338,5 mln-ǵa jetip, 2,3 esege ulǵaıdy. Jetkizilimderdiń ósýi, eń aldymen, bıdaı jáne bıdaı-qara bıdaı uny, kúnbaǵys maıy jáne basqa da ónimder eksportynyń ulǵaıýyna baılanysty.
Aıta keteıik, Ghazanfar Bank — Aýǵanstandaǵy eń kóne kommertsııalyq banktiń biri jáne. Bank korporatıvti jáne bólshek klıentterge dástúrli jáne ıslamdyq banktik qyzmetterdiń tolyq spektrin usynady. Sońǵy tórt jyl ishinde Ghazanfar Bank Aýǵanstan retteýshisi tarapynan bankterdiń qarjylyq turaqtylyǵyn, basqarý sapasyn, ótimdiligi men senimdiligin baǵalaýdyń eń joǵary kórsetkishiniń biri — CAMEL 2 reıtıngin aldy. Qazaqstanda Ghazanfar Bank Zaman bank-pen seriktestesedi.
Osyǵan deıin Serik Jumanǵarın ekonomıkany boljaýǵa biryńǵaı zııatkerlik model qajet ekenin aıtty.
