Qazaqstan men Aýǵanstan arasyndaǵy saýda aınalym 330,7 mln dollarǵa jetti
ALMATY. KAZINFORM – Almatyda Qazaqstan men Aýǵanstan arasyndaǵy saýda-ekonomıkalyq yntymaqtastyqty damytýǵa baǵyttalǵan «Qazaqstan-Aýǵanstan» bıznes-forýmy ótip jatyr.
Qazaqstan Respýblıkasy Premer-Mınıstriniń orynbasary Serik Jumanǵarınniń aıtýynsha, Qazaqstan Ońtústik jáne Ortalyq Azııa óńirinde Aýǵanstandy mańyzdy ári ajyramas seriktes retinde qarastyrady.
Qazaqstan men Aýǵanstannyń saýda salasynda ekijaqty jáne óńirlik formatta yntymaqtastyqty damytýǵa zor áleýeti bar.
«Bizdiń kezdesýlerimiz turaqty sıpatqa ıe. Bul eki eldiń saýda-ekonomıkalyq yntymaqtastyqty nyǵaıtýǵa degen joǵary qyzyǵýshylyǵyn kórsetedi. Osy jyldyń 8 aıynyń qorytyndysy boıynsha ózara saýda kólemi $330,7 mln-ǵa jetti. Onyń ishinde eksport 316,5 mln dollar. Al, Aýǵanstannan ımport $14,1 mln boldy. Biz ózara saýda aınalymyn arttyrý jáne elderimizdiń ekonomıkalyq belsendiligin arttyrý tek saýda-sattyqpen shektelmeıdi, sonymen qatar birlesken ónerkásiptik jobalardy iske asyrýǵa baılanysty dep senemiz. Memlekettik organdardyń, logıstıkalyq operatorlardyń jáne iri óndiristik kompanııalardyń qatysýymen kelissózder júrgizilip, odan ári ózara is-qımyldyń negizgi baǵyttary aıqyndaldy», - dedi forým barysynda Serik Jumanǵarın.
Aýǵanstannan kelgen 170 kompanııa ókilderi kólik, munaı óndirý, bolat ónerkásibi, kilem jasaý, aýyl sharýashylyǵy, bank sektory, saýda jáne basqa salalarda qyzmet atqarady.
Forýmnyń qorytyndysy boıynsha $50 mln-nan astam somaǵa saýda kelisimderi jasalady dep josparlanyp otyr.
