Qazaqstan men Armenııa zańsyz kóshi-qonmen birlese kúresedi - zań
ASTANA. KAZINFORM – Búgin Májilistiń jalpy otyrysynda «Qazaqstan Úkimeti men Armenııa Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly» Zańy qabyldandy.
Kelisimge 2024 jylǵy sáýirde Memleket basshysynyń Armenııaǵa resmı sapary barysynda qol qoıyldy.
- Qujatta taraptar memleketteriniń keletin azamattary, olardyń quqyqtyq mártebesi, azamattyqqa qabyldanǵan adamdar, ákimshilik jáne qylmystyq jaýapqa tartylatyndar týraly statıstıkamen ári málimettermen almasý, sondaı-aq zańsyz kóshi-qon áreketterine qarsy kúres ádisteri jáne kóshi-qon zańnamasynyń erekshelikteri týraly aqparatpen almasý eskerilgen. Bul málimetter elderge qos azamattyqqa qarsy kúres pen zańsyz kóshi-qon arnalarynyń jolyn kesý úshin qajet, - dedi Іshki ister mınıstri Erjan Sadenov.
Atalǵan qujat aıasynda quzyretti organdar retinde Qazaqstan jaǵynan Іshki ister jáne Eńbek mınıstrlikteri, al Armenııa tarapynan Іshki ister mınıstrligi belgilendi.
- Osyǵan uqsas kelisim 6 elmen jasaldy. Armenııa osy kelisimdi bıylǵy sáýirde ratıfıkatsııalady, - dedi mınıstr.
Buǵan deıin habarlanǵandaı, Májilis «Qazaqstan Respýblıkasynyń Úkimeti men Armenııa Respýblıkasynyń Úkimeti arasyndaǵy azamattardyń saparlary men bolý tártibi týraly kelisimdi ratıfıkatsııalaý týraly» Zańdy qabyldady.