Qazaqstan men Armenııa prezıdentteri «Astana» halyqaralyq qarjy ortalyǵyna bardy
ASTANA. KAZINFORM - Memleket basshysy Qasym-Jomart Toqaev pen elimizge resmı saparmen kelgen Armenııa Prezıdenti Vaagn Hachatýrıan «Astana» halyqaralyq qarjy ortalyǵyna bardy, dep habarlaıdy Aqordanyń baspasóz qyzmeti.
Prezıdentterge AHQO basqarýshysy Renat Bekturov qarjy ortalyǵy qyzmetiniń negizgi baǵyttary jáne onıń óńirlik bastamalardy damytýdaǵy úlesi týraly málimet berdi.
AHQO arqyly Qazaqstan ekonomıkasyna tartylǵan ınvestıtsııa kólemi 13 mıllıard dollardan asqan. Onyń 5,9 mıllıard dollary AIX bırjasyndaǵy portfeldik ınvestıtsııa bolsa, 7,3 mıllıard dollary AHQO-ǵa qatysýshy kompanııalarǵa tıesili. Búginde munda álemdegi 80-nen astam eldiń 3200-ge jýyq kompanııasy jumys isteıdi. Olardyń qatarynda aqparattyq-kommýnıkatsııalyq tehnologııalar, qarjy qyzmetteri men saqtandyrý salalaryna mamandanǵan Armenııanyń 6 iri kompanııasy da bar.
Sonymen qatar AHQO Soty men Halyqaralyq tórelik ortalyǵynyń qyzmeti, ortalyqtaǵy sot júıesiniń ereksheligi jóninde de aqparat berildi. Budan bólek, AHQO qarjy qyzmetterin retteý komıtetiniń jumysy týraly baıandaldy. Atalǵan komıtet pen Armenııa Respýblıkasynyń Ortalyq banki arasynda Bank jáne saqtandyrý qyzmetterin, baǵaly qaǵazdar naryǵyn qadaǵalaý jáne retteý salasyndaǵy ózara is-qımyl týraly memorandým jasalǵan.
Keshe Aqordada Armenııa Prezıdenti Vaagn Hachatýrıandy saltanatty qarsy alý rásimi ótti.
Sonymen qatar eki el basshylary Qalıbek Qýanyshbaev atyndaǵy Qazaq ulttyq mýzykalyq drama teatrynda Armenııanyń mádenıet kúnderine oraı uıymdastyrylǵan saltanatty kontsertke bardy.
Búgin Armenııa Prezıdenti Vaagn Hachatýrıan Qazaqstanǵa resmı sapary aıasynda Memlekettik basqarý akademııasy tyńdaýshylaryna dáris oqydy.
