Qazaqstan men Armenııa qupııa aqparat almasý salasyndaǵy yntymaqtastyqty júıelep jatyr
EREVAN. KAZINFORM — Armenııa parlamentiniń Qorǵanys jáne qaýipsizdik máseleleri jónindegi komıssııasy Qazaqstanmen qupııa aqparat almasýǵa baǵyttalǵan úkimetaralyq kelisim jobasyn qabyldaýdy qoldady, dep habarlaıdy Kazinform agenttiginiń Erevandaǵy menshikti tilshisi.
Armenııa Ulttyq qaýipsizdik qyzmeti dırektorynyń orynbasary Esaı Mkrtchıannyń aıtýynsha, qujatqa byltyr 21 qarashada Astanada qol qoıylǵan. Kelisim tolyq ratıfıkatsııalansa, resmı Astana men Erevan saıası, áskerı, ekonomıkalyq, quqyqtyq, ǵylymı-tehnıkalyq jáne basqa da salalardaǵy yntymaqtastyq aıasyndaǵy qupııa aqparatpen almasady.
Sonymen qatar taraptar mundaı derekterdi qorǵaý men saqtaýdy qamtamasyz etýi tıis. Qujatta aıqyndalǵan talaptardy oryndaýǵa Armenııa tarapynan Ulttyq qaýipsizdik qyzmeti, al Qazaqstan jaqtan Ulttyq qaýipsizdik komıteti jaýapty bolady.
Buǵan deıin habarlaǵanymyzdaı, Armenııa men Túrkııa ózara qarym-qatynasty jandandyrýǵa nıetti.
Eske salaıyq, taıaýda Armenııa men Ulybrıtanııa qorǵanys salasyndaǵy yntymaqtastyq baǵdarlamasyna qol qoıdy.