Qazaqstan men Armenııa bir-birinde medıtsına kúnderin ótkizýge ýaǵdalasty

ASTANA. KAZINFORM – Aldaǵy jyldary Qazaqstannyń Armenııadaǵy, Armenııanyń Qazaqstandaǵy medıtsına kúnderi ótkiziledi. Bul týraly Memleket basshysy Qasym-Jomart Toqaev Armenııa Premer-mınıstri Nıkol Pashınıanmen kelissózderden keıingi brıfıngte aıtty.

– Biz bilim jáne ǵylym salasyndaǵy qarym-qatynasty damytý joldaryn talqyladyq. Stýdent almasý úshin úkimetaralyq kelisimge qol qoıýdyń mańyzdylyǵyn atap óttik. Eki eldiń densaýlyq saqtaý salasyndaǵy áleýetin eskere otyryp, aldaǵy jyldary Qazaqstannyń Armenııadaǵy, Armenııanyń Qazaqstandaǵy medıtsına kúnderin ótkizýge kelistik, - dedi Memleket basshysy.

Sondaı-aq Qasym-Jomart Toqaev Armenııa Premer-mınıstrimen mádenı-gýmanıtarlyq saladaǵy ózara baılanystar týraly pikir almasqanyn aıtty.

- Byltyr Astanada Armenııa mádenıetiniń kúnderi ótkenin bilesizder. Al bıyl Erevanda alǵash ret Qazaqstannyń mádenıet kúnderi uıymdastyryldy. Armenııa astanasynda Abaı Qunanbaıuly atyndaǵy saıabaq ashyldy. Búgin elorda kósheleriniń birine uly armıan aǵartýshysy Mesrop Mashtotstyń esimi berildi. Osyndaı bastamalar halyqtarymyzdyń rýhanı jaqyndyǵyn kórsetedi. Bul – elderimizdiń ult perzentterine degen shynaıy qurmetiniń kórinisi, – dedi Prezıdent.

Aıta keteıik, Qasym-Jomart Toqaev pen Nıkol Pashınıan kelissóz qorytyndysy boıynsha Birlesken málimdeme qabyldady.