Qazaqstan men Armenııa arasyndaǵy taýar aınalymy artyp keledi
ASTANA. KAZINFORM — Qazaqstan men Armenııa arasyndaǵy taýar aınalymy shamamen $36 mln-ǵa, al bıylǵy qańtar-shilde aılarynda $28,7 mln-ǵa jetti. Bul týraly QR Ulttyq ekonomıka mınıstrligi jazdy.
QR Premer-mınıstriniń orynbasary — Ulttyq ekonomıka mınıstri Serik Jumanǵarın men Armenııa vıtse-premeri Mger Grıgorıannyń tóraǵalyǵymen Ekonomıkalyq yntymaqtastyq jónindegi úkimetaralyq Qazaqstan-Armıan komıssııasynyń 11-otyrysy ótti.
Beınekonferentsııa formatynda taraptar saýda-ekonomıkalyq áriptestikti damytý, ınvestıtsııalyq ózara is-qımyl, kólik, kommýnıkatsııa, aýyl sharýashylyǵy, densaýlyq saqtaý, mádenıet jáne týrızm salalaryndaǵy yntymaqtastyq sııaqty kóptegen máseleni talqylady.
Armenııa — Qazaqstannyń Ońtústik Kavkazdaǵy mańyzdy seriktesi. Eki el arasynda berik saıası dıalog ornatylyp, gýmanıtarlyq baılanystar qarqyndy damyp keledi. Memleketaralyq qatynastardy nyǵaıtýǵa baǵyttalǵan basshylyq saıasaty ekijaqty yntymaqtastyqtyń joǵary deńgeıin qamtamasyz etip otyr.
2024 jyldyń qorytyndysy boıynsha Qazaqstan men Armenııa arasyndaǵy taýar aınalymy shamamen $36 mln-ǵa, al bıylǵy qańtar-shilde aılarynda $28,7 mln-ǵa jetti.
— Biz saýda kólemin odan ári arttyrýǵa aıtarlyqtaı áleýet bar ekenin kórip otyrmyz. Bizdiń baǵalaýymyz boıynsha, Armenııaǵa eksporttyń qosymsha múmkindikteri eń aldymen, metallýrgııalyq, munaı-hımııa, hımııalyq jáne tamaq ónimderin jetkizý esebinen shamamen $350 mln bolýy múmkin, — dep atap ótti Serik Jumanǵarın.
Kólik salasyndaǵy yntymaqtastyqqa erekshe kóńil bólindi. Armenııa áýe kompanııalaryna qoldanystaǵy «ashyq aspan» rejımi aıasynda «áýe erkindiginiń» 5-deńgeıin paıdalaný quqyǵymen Qazaqstanǵa tikeleı reıster oryndaý usynyldy. Qazaqstan tarapy Erevandaǵy áýejaı alymdarynyń qunyn tómendetýge qyzyǵýshylyq bildirdi.
Investıtsııalyq salada Qazaqstan Atyraý jáne Mańǵystaý oblystarynda aýyl sharýashylyǵy ónimderin qaıta óńdeý boıynsha birlesken jobalardy júzege asyrýǵa jáne olardy ári qaraı Armenııaǵa eksporttaýǵa daıyn ekenin bildirdi. Sondaı-aq yntymaqtastyqtyń Jol kartasyna engizilgen zergerlik ónerkásipti damytý jónindegi armıan tarapynyń bastamasy da qoldaý tapty.
Mger Grıgorıan Armenııanyń Qazaqstan — Túrikmenstan — Iran — Armenııa baǵyty boıynsha mýltımodaldy júk tasymaldaryna arnalǵan kólik dálizin qurý jobasyn qoldaıtynyn atap ótti. Sonymen qatar ol Qytaı — Qazaqstan — Ózbekstan — Túrikmenstan — Iran — Armenııa baǵyty boıynsha tasymaldardyń qatar júrgizilip jatqanyn, bul eki el arasyndaǵy kólik-logıstıkalyq baılanystardy damytýǵa degen qyzyǵýshylyqtyń artyp kele jatqanyn kórsetetinin aıtty. Onyń sózinshe, bul tasymaldar, ásirese armıan kásipkerleriniń «Qorǵas» ShYHO múmkindikterine degen qyzyǵýshylyǵyn eskere otyryp, turaqty sıpatqa ıe bolýy múmkin.
Budan bólek, astyq jetkizý máselesi talqylandy. Qazaqstan ósip kele jatqan kólem men geografııany eskere otyryp, Armenııaǵa bıdaı jetkizýge daıyn ekenin rastady.
Otyrys qorytyndysy boıynsha taraptar Ekonomıkalyq yntymaqtastyq jónindegi úkimetaralyq qazaqstan-armıan komıssııasynyń 11-otyrysynyń hattamasyna qol qoıdy.
Aıta keteıik, buǵan deıin Qazaqstan men Armenııa arasynda vıza rejımi joıylatynyn jazǵan bolatynbyz.