Qazaqstan men Armenııa arasynda vıza rejımi joıylmaq

ASTANA. KAZINFORM – Májilis «Qazaqstan Respýblıkasynyń Úkimeti men Armenııa Respýblıkasynyń Úkimeti arasyndaǵy azamattardyń saparlary men bolý tártibi týraly kelisimdi ratıfıkatsııalaý týraly» Zańdy qabyldady.

- Kelisimge 2024 jylǵy sáýirde Memleket basshysynyń Armenııaǵa resmı sapary aıasynda qol qoıyldy. Qujatpen memleket azamattarynyń elde 30 kún bolǵannan keıin polıtsııada tirkelýi mindeti engizilip jatyr. Qazir olar polıtsııaǵa barmaı 90 kún bola alady. Bul normany engizý kóshi-qon baqylaýynyń tıimdiligin arttyrady. Jyl basynan beri Qazaqstanǵa 12 myńǵa jýyq Armenııa azamaty keldi. Sondaı-aq kelisimde ulttyq zańnamaǵa sáıkes 90 kúnnen astam eldi bolý múmkindigi kózdelgen. Ýaqytsha turýǵa ruqsat alý jetkilikti. Osylaısha, eki jaq úshin vızalyq rejım joıylady. Bul azamattardyń elge kelý kezinde shyǵyndaryn azaıtady, - dedi qujat boıynsha baıandama jasaǵan Іshki ister mınıstri Erjan Sádenov.

Onyń aıtýynsha, elge kirý úshin qajetti quraldar tizbesine mynalar engiziledi:

- Armenııa azamattary úshin sáıkestendirý kartasy;

- Qazaqstan azamattary úshin jeke kýálik.

- Osyndaı tájirıbe bar. Qazaqstan azamattary jeke kýálikpen Reseı men Qyrǵyzstanǵa erkin kire alady. Bul shara kelý jáne bolý tártibin jeńildetedi. Sodaı-aq pasport rásimdeý shyǵynyn azaıtady, - dedi mınıstr.

Buǵan deıin Májilis «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zańnyń jobasyn da qaraýǵa qabyldaǵan edi.