Qazaqstan men Armenııa arasynda tikeleı áýe reısteri qaıta ashylýy múmkin

ASTANA. KAZINFORM — Qazaqstan men Armenııa arasynda tikeleı áýe reısteri ashylýy múmkin. Bul týraly Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.

- Biz ol jaqqa temeki ónimderin, transformatorlar, ferroqorytpalar, metall buıymdary men metalprokat jetkizemiz. Olar bizge jemis- jıdek pen kókónister, sondaı-aq temeki ónimderin, álemge keńinen tanymal armıan konıagyn jetkizedi. Saýda aınalymy shyn máninde úlken emes - 82 mln AQSh dollary. Biraq 2020 jylmen salystyrǵanda 6 ese ósken. Bir kezeńderi saýda aınalymy budan da joǵary bolǵan. Ol Armenııadan bizge kólikterdiń kóp kelýimen baılanysty edi. Óte tanymal boldy. Bul ýaqytsha shara edi. Sebebi bizde avtomobıl óndirisi óte belsendi túrde damyp keledi, - dedi ol Aqordada BAQ ókilderiniń saýalyna oraı.

Sonymen qatar vıtse-premer jaqynda úkimetaralyq komıssııanyń 11-otyrysyn ótkizgen, Qazaqstan taraby Armenııaǵa 348 mln dollarǵa teń taýar usynǵanyn atap ótti. Munan bólek, elimizge armıan bıznesmenderiniń bir toby keletinin, olarmen birlesken kásiporyndar ashý máselesi talqylanatynyn aıtty.

- Eger Armenııa bizdiń batys óńirlerimizdi jemis-jıdpekpen jáne kókónispen qamtamasyz ete alsa, bul biz úshin óte tıimdi bolar edi. Eń bastysy – bizde buryn tikeleı áýe reısteri bolǵan, qazir ýaqytsha toqtattyq. Sebebi Erevan áýejaıyndaǵy qyzmet kórsetý óte qymbat, bir adamǵa 65 dollar, bir tonna avıakerosın 1 248 dollar turady. Qazir ony qandaı da bir jolmen sýbsıdııalaý máselesi qaralyp jatyr. Mundaı sharttarmen SCAT-ta, FlyArystan-da reısterdi qaıta ashýǵa daıyn, - dedi Serik Jumanǵarın.

Esterińizge sala ketsek, Armenııa Respýblıkasynyń Premer-mınıstri Nıkol Pashınıan resmı saparmen Astana qalasyna keshe keldi. 

Osydan biraz ýaqyt buryn Memleket basshysy Qasym-Jomart Toqaev elimizge resmı saparmen kelgen Armenııa Premer-mınıstri Nıkol Pashınıanmen kelissóz júrgizdi.