Qazaqstan men Argentınanyń birinshi raketkalary Astanada kúsh synasady
ASTANA. QazAqparat - 14 qyrkúıek kúni QR Ulttyq mýzeıinde tennısten Devıs Kýbogy oıyndary qarsańynda Qazaqstan jáne Argentına ulttyq komandalarynyń jerebe tartý rásimi ótedi, dep habarlady QazAqparatqa Qazaqstan tenıs federatsııasynan.
Devıs Kýbogynyń jerebe tartý rásimi jańa formatta, qazaqy naqyshta ótedi dep josparlanýda. Sharaǵa Argentına tennıs federatsııasynyń prezıdenti Armanda Chervone, Halyqaralyq tenıs federatsııasynyń ókili Ingrıd Lofdal-Bentser, Devıs Kýbogynyń bas tóreshisi Roberto Ranerı jáne Qazaqstan men Argentına komandalary qatysady.
Tennısten Qazaqstannyń Ulttyq quramasy sapynda Mıhaıl Kýkýshkın, Aleksandr Nedovesov, Dmıtrıı Popko, Denıs Evseev jáne komanda kapıtany - Dıas Dosqaraev bar. Al Argentına quramasynyń namysyn Dıego Shvartsman, Gvıdo Pelıa, Iassımo Gonsales jáne Andres Moltenı syndy tennısshiler qorǵaıdy. Argentına quramasynyń kapıtany - Danıel Orsanıch.
Aıta keteıik, 15-17 qyrkúıek kúnderi aralyǵynda Astanadaǵy Ulttyq tennıs ortalyǵynda Devıs Kýbogynyń Álemdik tobyna ótý úshin Qazaqstan-Argentına arasynda pleı-off matchy ótedi.
