Qazaqstan men Argentına yntymaqtastyqty odan ári damyta túspek
ASTANA. QazAqparat - Býenos-Aıreste QR Syrtqy ister mınıstriniń orynbasary Erjan Ashyqbaev bastaǵan qazaqstandyq delegatsııa qazaqstandyq-argentınalyq Syrtqy ister mınıstrligi aralyq konsýltatsııalardyń kezekti raýndyn ótkizdi. Bul týraly «QazAqparat» HAA QR Syrtqy ister mınıstrliginiń baspasóz qyzmetine silteme jasap habarlaıdy.
Argentına tarapyn Syrtqy ister mınıstriniń orynbasary Pedro Vıllagra Delgado bastap keldi. Taraptar ekijaqty qarym-qatynastardyń jaı-kúıi men ony damytýdyń perspektıvalaryn sóz etip, halyqaralyq kún tártibindegi ózekti máseleler boıynsha ózara pikir almasty. Ekijaqty qarym-qatynastardy damytýǵa eki tarap ta qyzyǵýshylyq tanytty. Olar ásirese saýda-ekonomıkalyq sala boıynsha yntymaqtasýǵa múddeli. Osyǵan qaraı, eki eldiń isker qoǵamdastyǵy ókilderiniń baılanystaryn jetildirýge kúsh salý qajettigi aıtyldy. Qazaqstandyqtar eksporttyq áleýeti joǵary taýarlardyń tizimin jasap, olardy Qazaqstan men Argentınanyń bıznes ortasyna taratýdy usyndy. Sonymen qatar taraptar eki el arasyndaǵy ǵylymı-tehnıkalyq yntymaqtastyqtyń áleýetine qatysty máselelerdi de sóz etti. Naqtyraq aıtqanda onda aeroǵarysh salasyna qatysty jáıtter sóz boldy.
Osy kúni E.Ashyqbaev Argentınanyń úkimet kabınetiniń birqatar ókilderimen júzdesti. Saıası yntymaqtastyq máselesi Argentınanyń Syrtqy ister mınıstri Sýsana Malkorramen bolǵan kezdesýinde qozǵaldy.
Argaentına Syrtqy ister mınıstri Qazaqstannyń 2017-2018 jyldary BUU Qaýipsizdik Keńesine turaqty emes músheligi kezinde qolǵa alatyn basymdyqtarynan habardar etildi. Qazaqstandyq dıplomat Argentınamen qaýipsizdik, ıadrolyq qarýdy taratpaý men qarýsyzdaný sııaqty máseleler aıasynda ekijaqty ózara seriktestiktiń jalǵasatyndyǵyna senim bildirdi. Argentınanyń BAQ jáne qoǵamdyq pikir mınıstri jáne osy eldiń EKSPO boıynsha komıssary Ernan Lombardımen kezdesýinde Argentınanyń kórmege qatysý máselesi sóz boldy.
Mınıstr Argentınanyń EKSPO-2017 kórmesine qatysýy qazaqstandyq-argentınalyq qarym-qatynastardy iskerlik yntymaqtastyq, energetıkalyq dıalog pen mádenı almasýlar sııaqty keń aýqymdy máseleler boıynsha damytýǵa yqpal etýi tıis ekendigin atap ótti.
Argentınanyń Energetıka mınıstriniń orynbasary Danıel Redondomen kezdesý barysynda taraptar jańǵyrtylatyn energııany damytý men osy saladaǵy ulttyq josparlar boıynsha ózara pikir almasty. E.Ashyqbaev atom energııasyn beıbit maqsatta paıdalaný boıynsha yntymaqtastyqty damytýdyń bolashaǵy týraly aıtyp, argentınalyq tarap paıdalana alýy múmkin qazaqstandyq atom ındýstrııasynyń baı zertteýshilik áleýetine nazar aýdardy. Óz kezeginde D.Redondo Astanada EKSPO kórmesi aıasynda uıymdastyrylǵaly otyrǵan turaqty damýǵa arnalǵan energetıka boıynsha ótetin 8-shi halyqaralyq forým aıasynda bolatyn Mınıstrlikter konferentsııasyna qyzyǵýshylyq tanytty.
Jalpy alǵanda Argentınada ótken kelissózder men Syrtqy ister mınıstrlikteri aralyq konsýltatsııalar qazaqstandyq-argentınalyq seriktestikti odan ári damytý úshin aıtarlyqtaı áleýettiń bar ekendigin kórsetti.
