Qazaqstan men Aljır sý resýrstary salasyndaǵy ekijaqty yntymaqtastyqtyń jol kartasyn ázirlemek
ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov Qazaqstandaǵy Aljır Halyq Demokratııalyq Respýblıkasynyń Tótenshe jáne ókiletti elshisi Osman Mıhadjımen kezdesti.
Taraptar sý sharýashylyǵy salasyndaǵy ekijaqty yntymaqtastyqtyń perspektıvaly baǵyttaryn talqylady. Kezdesýde eki eldiń de sý resýrstaryn saqtaý jáne bólý máselelerinde uqsas syn-qaterlerge tap bolyp otyrǵany aıtyldy.
Aljır tarapy Qazaqstannyń sý resýrstaryn basqarýdy tsıfrlandyrý salasyndaǵy tájirıbesine qyzyǵýshylyq tanytty. Mınıstrlik málimetinshe, sheteldik delegatsııa qazaqstandyq jáne aljırlik ǵylymı uıymdardyń birlesken zertteýler júrgizýin kózdeıtin pılottyq jobalardy iske asyrý múmkindigin qarastyrýdy usyndy.
Sonymen qatar ónerkásiptik sý paıdalaný, sýdy tuşytý jáne jerasty sý qorlaryn ıgerý baǵyttarynda tájirıbe almasý máseleleri talqylandy.
Osman Mıhadjı QR Sý resýrstary jáne ırrıgatsııa mınıstrligine eki jyldyq merzimge arnalǵan ekijaqty yntymaqtastyqtyń jol kartasyn ázirleýdi usyndy.
Kezdesý qorytyndysy boıynsha taraptar osy másele boıynsha birlesken jumys tobyn qurýǵa kelisti.
– Eki elde de ónerkásip pen aýyl sharýashylyǵyndaǵy sý tutyný úlesi bir-birine óte uqsas. Sondyqtan Aljırdiń ekonomıkanyń túrli salalary men turǵyn úı-kommýnaldyq sharýashylyqta sýdy únemdeý jáne tıimdi bólý tájirıbesi bizge qyzyq. Sonymen qatar sý sharýashylyǵy salasyndaǵy ózara tájirıbe almasý úshin eki eldiń mamandaryn almastyrý múmkindigin de qarastyrýǵa bolady, - dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, sý máselesi boıynsha Qazaqstan men Ózbekctan arasyndaǵy dıalog naqty nátıje berip keledi.
