Qazaqstan men Albanııanyń jetekshi aqparat agenttikteri — Kazinform jáne ATA baılanys ornatty
ASTANA. KAZINFORM — QR Prezıdentiniń Teleradıokesheni quramyndaǵy Kazinform halyqaralyq aqparat agenttigi álemdik medıa kompanııalarmen áriptestik baılanystaryn odan ári kúsheıtip jatyr.
Kazinform HAA men Albanııanyń telegraf agenttigi (ATA) arasynda ózara túsinistik týraly memorandýmǵa qol qoıyldy. Sonyń arqasynda álemdegi oqıǵalar týraly aqparat almasý jáne olardy birlesip jarııalaý úshin jańa múmkindikter ashylyp otyr.
Bul memorandým jańalyqtarmen, sýrettermen, basqa da materıaldarmen almasýǵa, sonymen birge, atalǵan elderdegi jáne álemdegi saıası, ekonomıkalyq, mádenı, sporttyq t. b. oqıǵalardy birlesip jarııalaýǵa jol ashady.
Qujatqa Prezıdent Teleradıokesheni dırektory Raýshan Qajybaeva men ATA bas dırektory Valbona Jýpa qol qoıdy.
Memleket basshysynyń qyzmeti jáne eldegi, óńirdegi mańyzdy qoǵamdyq-saıası úderister jóninde aqparat taratatyn Qazaqstan Prezıdentiniń Teleradıokesheni úshin atalǵan memorandým — aıtarlyqtaı jetistik. Respýblıkanyń negizgi medıaresýrstarynyń birine bul yntymaqtastyq álemdik aqparat keńistigindegi rólin keńeıtýge múmkindik beredi.
— Halyqaralyq baılanystardy damytý — Prezıdent Teleradıokesheni qyzmetiniń basym baǵyttarynyń biri. Bedeldi agenttiktermen áriptestik ornatý arqyly álemdik aýdıtorııaǵa obektıvti ári tekserilgen aqparatty jetkize alamyz. ATA-men jasalǵan kelisim birlesken jumys úshin jańa múmkindikter ashyp, eki el arasyndaǵy baılanys arnalaryn nyǵaıtady, — dedi Prezıdent Teleradıokesheni dırektory Raýshan Qajybaeva.
Al ATA bas dırektory Valbona Jýpanyń pikirinshe, «jalǵan aqparat pen feık jańalyqtarǵa qarsy kúres kásibı ári senimdi aqparat kózderin talap etetin qazirgideı kezeńde iri halyqaralyq agenttiktermen yntymaqtastyq ornatýdyń mańyzy zor».
— Kazinform-men jasalǵan memorandým eki el arasynda jańa kommýnıkatsııalyq kópirler ornatýǵa sebe bolady. Odan bólek, qoǵamǵa Albanııa men Qazaqstandaǵy oqıǵalar týraly dál ári alǵashqy derekkózden alynǵan, tekserilgen aqparat usynýǵa múmkindik beredi, — dedi ATA bas dırektory Valbona Jýpa.
Memorandým saıası, ekonomıkalyq, mádenı jáne sporttyq oqıǵalardy birlesip jarııalaýmen ǵana shektelmeıdi. Sondaı-aq, onda jýrnalısterge kásibı qoldaý kórsetý, tájirıbe almasý jáne uzaq merzimdi yntymaqtastyqtyń turaqty negizin qalyptastyrý tetikteri de qamtylǵan.
Anyqtama:
Kazinform — Qazaqstannyń eń kóne halyqaralyq aqparat agenttigi. Kazinform jańalyqtary qazaq, orys, aǵylshyn, qytaı jáne ózbek tilderinde taraıdy. Sonymen qatar, sheteldegi otandastarymyz úshin jańalyqtar latyn grafıkasy men arab jazýynda da qoljetimdi.
Albanııanyń aqparat agenttigi (ATA) — halyqaralyq seriktestik baılanystary damyǵan, Albanııadaǵy jalǵyz resmı aqparat agenttigi.
Aıta keteıik, buǵan deıin TMD elderiniń aqparat agenttikteri týrızmdi damytý baǵytyndaǵy yntymaqtastyqty kúsheıtetinin jazǵanbyz.
