Qazaqstan men Albanııa saýda baılanystaryn nyǵaıtýǵa nıetti
ASTANA. QazAqparat - Búgin Astanada QR Syrtqy ister mınıstri Qaırat Ábdirahmanov pen Albanııa Syrtqy ister mınıstri Dıtmır Býshatıdiń qatysýymen kelissózder ótti. Onyń aıasynda mınıstrler eki eldiń vedomstvolary arasynda yntymaqtastyq týraly hattamaǵa qol qoıdy, dep habarlaıdy QazAqparat.
Sonymen qatar búgingi kelissózderden keıin Qazaqstan Syrtqy saýda palatasy men Albanııanyń Tırana qalasy Saýda-ónerkásiptik palatasy arasynda ózara túsinistik memorandýmy bekitildi.
«Búgin bizdiń saýda palatalarymyz arasynda óte mańyzdy qujatqa qol qoıyldy. Bul qujatty tájirıbe júzinde iske asyrýdyń múmkindigi zor, ıaǵnı eki eldiń isker toptary arasyndaǵy yntymaqtastyq úshin jaqsy perspektıvalardy asha alamyz», - dedi QR Syrtqy ister mınıstri Qaırat Ábdirahmanov.
Sonymen qatar mınıstr eki el birqatar salalarda qarym-qatynasty nyǵaıtýǵa nıetti ekenin atap ótti.
«Búgingi ekijaqty kelissózder barysynda baılanystardy damytýǵa qatysty birqatar máselelerdi talqyladyq. Atap aıtqanda, biz saýda-ekonomıkalyq ári ınvestıtsııalyq baǵyttarda yntymaqtastyqty nyǵaıtýǵa qatysty birqatar basymdyqtardy aıqyndadyq. Osy oraıda bizdiń baılanystarymyzdy qajet etetin salalar az emes. Sondyqtan qurylys, kólik, aýyl sharýashylyǵy, logıstıka, energetıka baǵyttaryn qarastyrdyq», - dedi Q. Ábdirahmanov.
Óz kezeginde Dıtmır Býshatı de qol qoıylǵan qujattar eki el kásipkerleriniń yntymaqtastyǵy úshin jańa múmkindikter ashatyndyǵymen kelisti.
«Biz aýyl sharýashylyǵy, týrızm, kólik, mádenıet salalarynda qarym-qatynastardy nyǵaıtýǵa múddelimiz. Sondyqtan bizdiń delegatsııa quramyndaǵy ókilder osy maqsatty kózdep keldi. Bul turǵyda saýda palatalary arasyndaǵy memorandým aıasynda tıisti jumystardy ilgeriletýge nıettimiz», - dedi D. Býshatı.
