Qazaqstan men AQSh JOO-lary JI men bıotehnologııa salasynda birlesken jobalardy iske asyrady
ASTANA. KAZINFORM – QR Premer-mınıstri Oljas Bektenov Arızona ýnıversıtetiniń prezıdenti, doktor Sýresh Garımellamen kezdesti, dep habarlaıdy Úkimettiń baspasóz qyzmeti.
Kezdesýde bilim berý salasyndaǵy yntymaqtastyqty damytý, Qazaqstan úshin basym baǵyttar boıynsha birlesken akademııalyq baǵdarlamalardy keńeıtý, ǵylymı zertteýler júrgizý jáne tehnologııalar transferi máseleleri talqylandy.
Arızona ýnıversıteti Qazaqstannyń ǵylymı-bilim berý áleýetin arttyrý baǵytynda áriptestik ornatqan alǵashqy sheteldik joǵary oqý oryndarynyń biri boldy.
Búginde M.Qozybaev atyndaǵy Soltústik Qazaqstan ýnıversıteti men Arızona ýnıversıteti arasynda strategııalyq seriktestik jolǵa qoıylǵan. Birlesken baǵdarlamalar boıynsha 1,2 myńnan astam stýdent bilim alyp jatyr. Bıyl alǵashqy túlekter oqýyn aıaqtaıdy.
– Qazaqstannyń jańa Konstıtýtsııasy bilim, ǵylym jáne ınnovatsııany memlekettik saıasattyń strategııalyq baǵyttary retinde aıqyndaıdy. Qazaqstan Prezıdenti Qasym-Jomart Toqaev adamı kapıtaldy damytýdy elimizdiń basty basymdyqtarynyń biri retinde belgiledi. Biz úzdik halyqaralyq tájirıbelerdi engizip, ǵylymı-zertteý yntymaqtastyǵyn keńeıte otyryp, óńirlik akademııalyq jáne zertteý habyn qalyptastyratyn bolamyz, – dedi Oljas Bektenov.
Arızona ýnıversıtetiniń prezıdenti Sýresh Garımella Qozybaev ýnıversıtetimen birlesken jobanyń tabysty júzege asyrylyp jatqanyn atap ótti. Onyń aıtýynsha, yntymaqtastyqtyń negizgi baǵyttarynyń biri – ǵylymı zertteýlerdi damytý.
– Biz bilim berýdegi yntymaqtastyq modelin Qozybaev ýnıversıtetinde qoldandyq, sol arqyly stýdentterdiń kóp sanyn qamtı otyryp, sizdiń eldegi basqa da joǵary oqý oryndarynda keńinen taratýǵa bolatynyn dáleldedik. Ózimiz úshin úsh negizgi basymdyqty tańdadyq, olar – stýdentterdiń jetistigi, ǵylymı zertteýler jáne qoǵamǵa qyzmet etý men jergilikti qaýymdastyqtardyń damýy, – dedi Sýresh Garımella.
Kezdesýde ǵylymı-zertteý baǵytyndaǵy birlesken jumystarǵa erekshe nazar aýdaryldy.
Qozybaev ýnıversıteti men Arızona ýnıversıteti sý resýrstary, agrogenomıka, bıoınformatıka, kúkirt óńdeý, jasandy ıntellekt, tsıfrlyq densaýlyq saqtaý jáne ınklıýzıvti bilim berý baǵyttary boıynsha jobalardy júzege asyryp keledi.
Sonyń biri – Soltústik Qazaqstan oblysynyń sý resýrstaryna monıtorıng júrgizý, tazartý jáne tıimdi paıdalaný jobasy.
Sonymen qatar aýyl sharýashylyǵy daqyldarynyń genomdyq selektsııasy, Qazaqstandaǵy biregeı janýarlar men ósimdikterdiń, onyń ishinde Kaspıı ıtbalyǵy men Greıg qyzǵaldaǵynyń genofondyn saqtaý baǵytynda zertteýler júrgizilip jatyr.
Budan bólek, kúkirtti qaıta óńdeý tehnologııalaryn ázirleý jáne joǵary qosylǵan quny bar ónimder shyǵarý boıynsha birlesken joba iske asyrylýda.
Kezdesý qorytyndysynda taraptar yntymaqtastyqty odan ári damytý jáne kadr daıarlaý sapasyn arttyrýdyń mańyzdylyǵyn atap ótti.
Aıta keteıik, elde alǵashqy Montessorı ǵylymı-zertteý zerthanasy ashylady.
