Qazaqstan men AQSh jahandyq qaýipsizdikke orasan úles qosyp otyr - Ábdiqalyqova
Konferentsııaǵa sondaı-aq QR-daǵy AQSh elshisi D.Krol, Prezıdent Ákimshiligi qurylymdyq bólimsheleriniń, memlekettik organdardyń basshylary, dıplomatııalyq qyzmet ardagerleri, halyqaralyq uıymdar men sheteldik dıplomatııalyq korpýstyń, qoǵamdyq uıymdardyń, ǵylymı-zertteý mekemeleri men oqý oryndarynyń ókilderi qatysty.
Memlekettik hatshy óziniń quttyqtaý sózinde Qazaqstan Respýblıkasynyń Tuńǵysh Prezıdenti Nursultan Nazarbaevtyń syndarly syrtqy saıasaty qazaqstandyq memlekettiliktiń nyǵaıýyna, eldiń ekonomıkalyq áleýetin tıimdi paıdalanýǵa, elimiz úshin qaýipsizdiktiń aldaǵy ondaǵan jyldarǵa mejelengen júıeli qurylymy men kepildigin qalyptastyrýǵa qolaıly jaǵdaı jasaýdy qamtamasyz etkenin aıtty.
Ol sonymen qatar, ótken shırek ǵasyr ishinde bizdiń yntymaqtastyǵymyz ózara senimge, qoldaýǵa jáne ulttyq múddelerge qurmetpen qaraýǵa negizdelgen strategııalyq seriktestik sıpatyndaǵy kemel qarym-qatynas deńgeıine jetkenin atap ótti.
Gúlshara Ábdiqalyqova halyqaralyq beıbitshilik pen jahandyq qaýipsizdikti nyǵaıtý isine Qazaqstan men AQSh-tyń birlese otyryp orasan úles qosqanyna toqtaldy. Jahandyq ornyqty damý úshin jańa tehnologııalardy damytýǵa birlese umtylǵan álemniń 115 eli atsalysyp, «Bolashaqtyń energııasy» taqyrybymen ótip jatqan EKSPO-2017 kórmesi - jahandyq túıtkilderdi sheshý jolyndaǵy jarasymdy yntymaqtastyq rýhynyń jarqyn kórinisi bolyp tabylady.
Konferentsııa aıasynda halyqaralyq qaýipsizdik, sondaı-aq beıbitshilikti saqtaý, saýda-ekonomıkalyq jáne mádenı-gýmanıtarlyq yntymaqtastyqty ilgeriletý salalaryndaǵy Qazaqstan men AQSh-tyń ózara yqpaldastyǵyna arnalǵan úsh otyrys ótti.
