Qazaqstan men AQSh veterınarııa mamandaryn oqytý máselesin talqylady

NUR-SULTAN. QazAqparat - Qazaqstan jáne AQSh Aýyl sharýashylyǵy mınıstrlikteriniń ókilderi mal sharýashylyǵy salasyndaǵy yntymaqtastyq máselelerin talqylady, dep habarlaıdy QazAqparat tilshisi vedomstvonyń baspasóz qyzmetine silteme jasap.

Baspasóz qyzmetiniń málimetinshe, Qazaqstan Respýblıkasynyń Aýyl sharýashylyǵy mınıstrligi jáne AQSh memleketiniń ýákiletti organy telekonferentsııa ótkizdi, onda mal sharýashylyǵyndaǵy bıologııalyq qaýipsizdik máseleleri boıynsha yntymaqtastyq múmkindigi talqylanǵan.

«Amerıka eliniń ókilderi qaýipti aýrýlardy anyqtaý jáne dıagnostıkalaý daǵdylaryn arttyrý úshin veterınarlyq mamandardy oqytýdy qarastyratyn «Bıologııalyq qaýipti azaıtý baǵdarlamasy» aıasynda yntymaqtastyqty usyndy. Atap aıtqanda, veterınarııa mamandary men malshylardy oqytý, veterınarııalyq beıindegi oqý baǵdarlamalaryn jáne kásibı lıtsenzııalaý júıelerin ázirleý, turaqty damý boıynsha semınarlar ótkizý, asa qaýipti patogenderden týyndaǵan aýrýdy anyqtaý jáne dıagnostıkalaý boıynsha oqý materıaldaryn jańartý jáne taratý máseleleri talqylandy», delingen habarlamada.

Sonymen qatar, AQSh tarapy qazaqstandyq mal ósirýshilerge DDU/HEB/FAO-men úshjaqty yntymaqtastyq negizinde asa qaýipti patogender boıynsha eseptilikti anyqtaý, dıagnostıkalaý jáne uıymdastyrý úshin «Biryńǵaı ulttyq densaýlyq» qurylymyn ázirleýge jáne ınstıtýt qalyptastyrýǵa járdem kórsetýge daıyn.