Qazaqstan men AQSh ushý qaýipsizdigin aldyn ala baǵalaý týraly kelisti
ASTANA. KAZINFORM — Qazaqstannyń avıatsııalyq ákimshiligi men AQSh Federaldy avıatsııa ákimshiligi arasynda ushý qaýipsizdigin aldyn ala halyqaralyq baǵalaýdy (IASA) júrgizý týraly kelisimge qol qoıyldy. Bul týraly QR Kólik mınıstrliginiń baspasóz qyzmeti málimdedi.
Memleket basshysynyń Qazaqstan men AQSh arasynda tikeleı áýe qatynasyn uıymdastyrý jónindegi tapsyrmasyn júzege asyrý sheńberinde Qazaqstannyń avıatsııalyq ákimshiligi Kólik mınıstrliginiń Azamattyq avıatsııa komıtetimen jáne Qazaqstan Respýblıkasynyń AQSh-taǵy Elshiligimen birlese otyryp ári QR Syrtqy ister mınıstrliginiń qoldaýymen AQSh Federaldy avıatsııalyq ákimshiligimen ushý qaýipsizdigi boıynsha aldyn ala halyqaralyq baǵalaýdy (IASA) ótkizý týraly kelisimge qol qoıdy.
«Qujatta ózara aqparat almasý, tehnıkalyq kómek jáne áleýetti arttyrý sharalaryn qosa alǵanda, IASA aldyn ala baǵalaý protsesine baǵyttalǵan birlesken tásilder qarastyrylǵan. Atalǵan kelisim Qazaqstanda ushý qaýipsizdigin qamtamasyz etý deńgeıin arttyrý boıynsha Qazaqstannyń avıatsııalyq ákimshiligi, Azamattyq avıatsııa komıteti jáne Federaldy avıatsııalyq ákimshiligi arasyndaǵy yntymaqtastyqty kúsheıtýge múmkindik beredi dep kútiledi» - delingen habarlamada.
Málim bolǵandaı, aldyn ala baǵalaý sheńberinde IASA Federaldy avıatsııalyq Ákimshiligi avıakompanııalary ushýǵa ótinish bergen, AQSh-qa ushatyn nemese amerıkalyq áýe kompanııalarynyń kodsher boıynsha kelisimshartyna qatysatyn elderdiń azamattyq avıatsııa organdarynyń IKAO-nyń ushý qaýipsizdigi jónindegi halyqaralyq standarttaryn saqtaýyn baǵalaıdy.
IASA-ny aldyn ala baǵalaý budan ári Federaldy avıatsııalyq ákimshiliginiń 1-sanattaǵy mártebesin alýǵa baǵyttalǵan jáne tıisti áýe kemeleri bolǵan kezde Qazaqstan men AQSh arasyndaǵy otandyq áýe kompanııalaryna tikeleı áýe qatynasyn iske qosýǵa múmkindik beredi.
Kelisim QR avıatsııa bıliginiń ushý qaýipsizdiginiń eń joǵary standarttaryn saqtaýǵa umtylysyn aıqyndap, Qazaqstan men Amerıka Qurama Shtattary arasyndaǵy baılanystar men ekonomıkalyq múmkindikterdi keńeıtýge yqpal etetin bolady.
