Qazaqstan men AQSh-tyń strategııalyq seriktestigi buryn-sońdy bolmaǵan deńgeıge kóterildi — sarapshy
ASTANA. KAZINFORM — AQSh Prezıdenti Donald Tramptyń Qazaqstan Táýelsizdiginiń 35 jyldyǵymen quttyqtaýy jaı sımvolıkalyq jaǵdaı emes. Bul jóninde Qazaqstandyq qoǵamdyq damý ınstıtýtynyń sarapshysy Nurǵazy Ánýarbekov Kazinform agenttigi tilshisine aıtyp berdi.
— AQSh Prezıdenti Donald Tramptyń elimiz úshin qasıetti mereke – Táýelsizdiktiń 35 jyldyǵymen quttyqtaýy jaı sımvolıkalyq jaǵdaı emes. AQSh – Qazaqstan táýelsizdigin alǵashqylardyń biri bolyp moıyndap, bizdiń elmen dıplomatııalyq qarym qatynas ornatqan memleket. Mine, taǵy da bizdiń elge degen nıetiniń durys ekenin, Qazaqstannyń dosy ekenin bildirip, el Táýelsizdiginiń 35 jyldyǵymen alǵashqy bolyp resmı quttyqtaý joldap otyr, — dedi ol.
Sarapshynyń sózinshe, Qazaqstan men AQSh arasyndaǵy dıplomatııalyq, ekonomıkalyq jáne áleýmettik-mádenı baılanystar osy 35 jylda tek jaqsy baǵytta órbip keledi.
— AQSh — osy jyldary Qazaqstan ekonomıkasyna asa iri mólsherde ınvestıtsııa salǵan memleketterdiń biri. Ásirese, sońǵy jyldary AQSh-tyń Qazaqstanmen ara-qatynasy, strategııalyq seriktestigi buryn-sońdy bolmaǵan deńgeıge kóterilip, eki el qatynasyn bekemdeı túsýge baǵyttalǵan mańyzdy qadamdar jasalyp jatyr. Bul týraly AQSh Prezıdenti Donald Tramp ta óziniń quttyqtaý hatynda atap ótken. Eki eldiń keńeıtilgen strategııalyq seriktestigi úshin rızashylyǵyn bildire otyryp, ony odan ári nyǵaıtýǵa nıetti ekenin jáne ondaı nátıjege qol jetkizýge bizdiń Prezıdent Qasym-Jomart Toqaevtyń orasan zor eńbek sińirgenin atap ótken. Sondaı-aq «Qazaqstan halqy Sizdeı myqty ári batyl kóshbasshynyń basshylyǵynda ómir súrip jatqanyna baqytty. Men osy mańyzdy tarıhı belesti atap ótýde Qazaqstan halqymen birge ekenimdi maqtan tutamyn» delinedi. Donald Tramp myrzanyń bul quttyqtaý haty Prezıdent Qasym-Jomart Toqaevtyń álemdik deńgeıde moıyndalǵan kóshbasshy ekenin, álemdik saıası arenadaǵy salmaǵyn jáne Qazaqstannyń «Orta derjava» retinde moıyndalǵanyn kórsetedi, — dedi Nurǵazy Ánýarbekov.
Aıta keteıik, buǵan deıin Tramp Qasym-Jomart Toqaevty el Táýelsizdiginiń 35 jyldyǵymen quttyqtaǵanyn jazǵanbyz.
Sonymen qatar, osyǵan deıin Qazaqstandyq qoǵamdyq damý ınstıtýty Instıtýtsıonaldyq taldaý jáne reformalar ortalyǵynyń sarapshy-keńesshisi Kámıla Amýrtaeva Qazaqstan Vashıngton úshin derbes strategııalyq mańyzy bar memleketke aınalyp kele jatqanyn aıtty.
