Qazaqstan men AQSh sý salasynda kúsh biriktiredi: Arızona ýnıversıtetimen jańa qadam
ASTANA. KAZINFORM — Qazaqstan men Arızona ýnıversıteti sý resýrstaryn basqarý, gıdrologııalyq modelderdi damytý jáne mamandar daıarlaý baǵytyndaǵy yntymaqtastyqtyń jol kartasyn ázirlep jatyr. Bul týraly vedomstvonyń baspasóz qyzmeti málim etti.
Sý resýrstary jáne ırrıgatsııa mınıstrligi men Arızona ýnıversıteti (ASU) yntymaqtastyqtyń jol kartasyn ázirlep jatyr. Qujat aıasynda qazaqstandyq mamandarǵa arnalǵan birlesken semınarlar, oqý kýrstary men taǵylymdamalar uıymdastyrý, elimizdiń erekshelikterin eskere otyryp, gıdrologııalyq modelderdi ázirleý jáne beıimdeý, sondaı-aq klımattyń ózgerýi jaǵdaıynda sý resýrstaryn turaqty basqarý salasyndaǵy birlesken jobalardy iske asyrý kózdelgen. Eske salaıyq, bıyl Sý resýrstary jáne ırrıgatsııa mınıstri Nurjan Nurjigitov Arızona ýnıversıtetiniń prezıdenti Sýresh Garımellamen kezdesip, yqtımal yntymaqtastyq baǵyttaryn talqylaǵan bolatyn.
— Biz kadrlar daıarlaý jáne jumys istep júrgen mamandardyń biliktiligin arttyrý salasyndaǵy halyqaralyq yntymaqtastyqqa árdaıym ashyqpyz. Máselen, Taraz qalasyndaǵy Qazaq ulttyq sý sharýashylyǵy jáne ırrıgatsııa ýnıversıteti Vengrııanyń jetekshi joǵary oqý oryndarymen qos dıplomdy bilim berý baǵdarlamasyn júzege asyryp keledi. Al mınıstrlikke qarasty uıymdar Qytaı, AQSh jáne Nıderland mamandarymen tyǵyz baılanysta jumys isteıdi, — dedi Sý resýrstary jáne ırrıgatsııa vıtse-mınıstri Talǵat Momyshev.
Aıta keteıik, qazirgi ýaqytta Arızona ýnıversıteti Qazaqstanda M. Qozybaev atyndaǵy Soltústik Qazaqstan ýnıversıtetiniń bazasynda jumys isteıdi. Bul joǵary oqý oryndary birlesken qos dıplomdy bilim berý baǵdarlamasyn júzege asyryp, birqatar ǵylymı-zertteý jobalaryn iske asyryp keledi.
