Qazaqstan men AQSh sý tazartý jáne ony qaıta paıdalaný salasyndaǵy yntymaqtastyqty damytyp jatyr
ASTANA. KAZINFORM - Amerıkalyq IBL Elements Inc. kompanııasynyń shaqyrýymen «Qazgıdrogeologııa» ulttyq gıdrogeologııalyq qyzmeti» KEAQ basqarma tóraǵasynyń birinshi orynbasary Dáýir Ibraev AQSh-tyń Oklahoma shtatyna jumys saparymen bardy. Bul týraly Sý resýrstary jáne ırrıgatsııa mınıstrligi habarlady.
Sapar barysynda ol óndiristik nysandardy aralap, ónerkásiptik jáne mıneraldanǵan sýdy tazartý, qaıta paıdalaný, sondaı-aq olardan qundy komponentterdi bólip alý baǵytyndaǵy zamanaýı sheshimdermen tanysty.
Jumys baǵdarlamasy aıasynda Dáýir Ibraev bastapqy sýdyń hımııalyq quramyn taldaý men ony aldyn ala daıyndaýdan bastap, súzý, tazartý, qaıta paıdalaný jáne paıdaly komponentterdi bólip alýǵa deıingi tehnologııalyq protsesti kórdi. Zerthanalyq baqylaý máselelerine, sondaı-aq amerıkalyq tehnologııalardy Qazaqstannyń gıdrogeologııalyq jáne óndiristik jaǵdaılaryna beıimdeý múmkindigine erekshe nazar aýdaryldy.
– Qazaqstan úshin bul sapardyń praktıkalyq mańyzy zor. Oklahoma – ónerkásiptik bazasy damyǵan, resýrstyq áleýeti joǵary jáne praktıkalyq tájirıbesi mol óńir. Biz úshin amerıkalyq tehnologııalardyń naqty óndiristik protseste qalaı qoldanylatynyn kórý asa mańyzdy boldy. AQSh-tyń tehnologııalyq tájirıbesi men Qazaqstannyń resýrstyq áleýetin ushtastyrýǵa, sondaı-aq qol jetkizilgen ýaǵdalastyqtardan naqty birlesken jobalardy júzege asyrýǵa kóshýge múmkindik bar dep esepteımiz, – dedi Dáýir Ibraev.
Amerıkalyq tarap ta Qazaqstanmen odan ári yntymaqtastyq ornatýdyń perspektıvalaryn joǵary baǵalady. IBL Elements Inc. kompanııasynyń dırektory Lııa Djenkıns amerıkalyq tehnologııalardy Qazaqstanda is júzinde qoldanýǵa kompanııanyń múddeli ekenin atap ótti.
– Biz Qazaqstandy uzaqmerzimdi yntymaqtastyq úshin zor áleýeti bar el retinde kóremiz. Qazaqstanda qajetti resýrstar, bilikti mamandar jáne zamanaýı tehnologııalyq jobalardy iske asyrýǵa keń múmkindikter bar. Biz jınaqtaǵan tájirıbemizdi bólisýge jáne qazaqstandyq seriktestermen birlesip, sheshimderimizdi eldiń naqty jaǵdaılaryna beıimdeýge daıynbyz, – dedi Lııa Djenkıns.
Aıta keteıik, ǵalamsharymyz sý qoryna baı bolǵanymen, paıdalanýǵa jaramdy tuşy sý kólemi shekteýli. Sondyqtan sýdy utymdy paıdalaný qazirgi zamannyń mańyzdy ekologııalyq mindetteriniń biri.
Kóptegen adam turmystaǵy sýdyń azdaǵan ysyrabyna mán bere bermeıdi. Alaıda qarapaıym ǵana tamshylap turǵan krannyń ózi aıtarlyqtaı sý shyǵynyna ákelýi múmkin.
