Qazaqstan men AQSh sý tasqynynyń aldyn alý jónindegi baǵdarlamany qabyldady
ASTANA. KAZINFORM – Qazaqstan men AQSh qar jamylǵysyn áýe arqyly monıtorıngteý jáne sý tasqynynyń aldyn alý jónindegi kezeń-kezeńimen iske asyrylatyn baǵdarlamany pysyqtap jatyr.
Sý resýrstary jáne ırrıgatsııa vıtse-mınıstri Aslan Abdraımov qar jamylǵysyn áýe arqyly monıtorıngteýge mamandanǵan Dynamic Aviation jáne Airborne Snow Observatories Inc. kompanııalarynyń ókilderimen kezdesti.
Kezdesýge AQSh-tyń Qazaqstandaǵy Elshiliginiń ókilderi de qatysty. Taraptar qar jamylǵysyn monıtorıngteý, kóktemgi sý aǵynyn boljaý jáne sý tasqyny qaýpi týraly erte eskertý salasyndaǵy yntymaqtastyq perspektıvalaryn talqylady.
Ózen basseınderi boıynsha derekter jınaý, kartografııalyq materıaldar men taldamalyq esepter ázirleý úshin zamanaýı avıatsııalyq tehnologııalardy qoldaný múmkindikterine, sondaı-aq alynǵan aqparatty mınıstrliktiń qoldanystaǵy modelderi men aqparattyq júıelerine ıntegratsııalaýǵa erekshe nazar aýdaryldy.
Talqylaý qorytyndysy boıynsha baǵdarlamany kezeń-kezeńimen iske asyrý týraly sheshim qabyldandy. Baǵdarlama aýqymy birtindep keńeıtilip, Qazaqstannyń sý resýrstaryn basqarý salasyndaǵy uzaq merzimdi mindetterine baǵyttalady.
Alǵashqy kezeńde jumystar Jabaı ózeni basseıninde júrgiziledi. Munda avıatsııalyq tehnologııalardyń kómegimen qar jamylǵysyna joǵary dáldiktegi ólsheýler júrgizilip, alynǵan derekter mınıstrliktiń qoldanystaǵy modelderi men júıelerine engiziledi. Bul ádistemeni synaqtan ótkizýge, otandyq mamandardy daıarlaýǵa jáne baǵdarlamany elimizdiń ózge óńirlerine keńeıtýdiń tıimdiligin baǵalaýǵa múmkindik beredi.
Sý resýrstary jáne ırrıgatsııa mınıstrligi málimetinshe, odan keıingi kezeńderde monıtorıng jáne boljaý jónindegi qyzmet úlgilerdiń sapasyn odan ári arttyrý, derekterdi ıntegratsııalaý jáne birlesken tehnıkalyq áleýetti damytý maqsatynda qosymsha basym sý jınaý basseınderi men óńirlerge taratylady.
Uzaq merzimdi perspektıva Sý resýrstaryn keshendi basqarý, sý tasqyny táýekelderin azaıtý, sý qoımalaryn paıdalaný jáne klımattyq turaqtylyqty arttyrý maqsatynda Qazaqstannyń barlyq aýmaǵyna osy múmkindikterdi masshtabtaýdy kózdeıdi.
Kezdesý barysynda qazaqstandyq mamandardy daıarlaý, derekterge qol jetkizý jáne olardy basqarý, jobaǵa qatysýshy uıymdar arasyndaǵy mindetter men jaýapkershilikti bólý, sondaı-aq jobany iske asyrýǵa qajetti tehnıkalyq jáne ákimshilik rásimder máseleleri de talqylandy.
– Qazaqstan úshin zamanaýı derekterdiń bolýy ǵana emes, sonymen qatar basqarýshylyq sheshimderdi aldyn ala qabyldaýǵa, sý tasqyny qaýpin tómendetýge jáne halyqty, ınfraqurylymdy ári aýyl sharýashylyǵyn qorǵaýǵa múmkindik beretin tıimdi praktıkalyq quraldyń bolýy mańyzdy, - dedi Sý resýrstary jáne ırrıgatsııa vıtse-mınıstri Aslan Abdraımov.
Kezdesý qorytyndysy boıynsha taraptar kezeń-kezeńimen iske asyrylatyn baǵdarlamany jáne ony Qazaqstan aýmaǵynda júzege asyrýdyń kelesi qadamdaryn talqylaýdy jalǵastyrýǵa kelisti.
Aıta keteıik, 2026 jylǵy sý tasqyny kezeńin boljaýda TALSIM jáne Tasqyn júıeleri óz tıimdiligin kórsetti. Bul týraly QR Sý resýrstary jáne ırrıgatsııa vıtse-mınıstri Aslan Abdraımov Ortalyq kommýnıkatsııalar qyzmetinde ótken brıfıngte málimdedi.
