Qazaqstan men AQSh sý tasqynyn boljaıtyn ozyq tehnologııalardy engizý máselesin talqylady

ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov amerıkalyq Dynamic Aviation kompanııasynyń bas dırektory jáne dırektorlar keńesiniń tóraǵasy Maıkl Stoltsfýspen kezdesti. Bul týraly vedomstvonyń baspasóz qyzmetin málim etti.

Taraptar sý tasqynyn boljaý jáne oǵan qarsy is-qımyl jasaý máseleleri boıynsha yntymaqtastyq múmkindikterin talqylady. Atap aıtqanda, aerotúsirilim arqyly qardyń qalyńdyǵyn ólsheý jáne onyń erýin boljaýǵa arnalǵan tehnologııalardy engizý máselesi sóz boldy. Kezdesý qorytyndysy boıynsha taraptar «Qazgıdromet» pen QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń mamandarynyń qatysýymen seriktestik baǵyttaryn egjeı-tegjeıli talqylaýǵa kelisti.

– Jyldyń basynda Qazaqstanda sý tasqynyn boljaý jáne modeldeý aqparattyq júıesi engizilgen bolatyn. Búginde basqa da jaýapty organdarmen birlesip, onyń jumysyn jetildirý joldaryn únemi izdestirip kelemiz. Onyń ishinde álemdik ozyq tehnologııalardy engizý arqyly, – dedi Sý resýrstary jáne ırrıgatsııa mınıstri Nurjan Nurjigitov.

Buǵan deıin habarlanǵandaı, otandyq sý salasy mamandary Qytaı, Frantsııa, AQSh, Japonııa syndy shet memleketterde biliktiligin arttyryp jatyr.