Qazaqstan men AQSh saýda-ekonomıkalyq yntymaqtastyqty keńeıtýge daıyn
ASTANA. KAZINFORM – QR Premer-mınıstri Oljas Bektenov AQSh Prezıdentiniń arnaıy ókili Serdjıo Gormen jáne AQSh Memlekettik hatshysynyń birinshi orynbasary Krıstofer Landaýmen saýda-ekonomıkalyq yntymaqtastyq máselelerin talqylady. Bul týraly Úkimettiń baspasóz qyzmeti habarlady.
Oljas Bektenov Qazaqstan Prezıdenti Qasym-Jomart Toqaev Amerıka Qurama Shtattarymen yntymaqtastyqty damytýǵa erekshe mán beretinin atap ótip, bul kezdesý ekijaqty qatynastardyń saýda-ekonomıkalyq áleýetin odan ári asha túsý úshin mańyzdy qadam bolatynyn aıtty.
Qazaqstan Úkimeti sheteldik, sonyń ishinde amerıkalyq bıznes úshin de qolaıly jaǵdaılar jasaýǵa baǵyttalǵan júıeli sharalardy júzege asyryp keledi.
QR Ulttyq bankiniń málimetinshe, 1993 jyldan beri AQSh-tan tikeleı ınvestıtsııalardyń jalpy aǵyny shamamen $61,2 mlrd boldy, bul Qazaqstandaǵy tikeleı sheteldik ınvestıtsııalardyń (TShI) jalpy kóleminiń 13%-ynan asady. Sońǵy bes jylda ózara saýda kólemi eki esege artyp, $4,2 mlrd-qa jetti.
Kezdesý barysynda qatysýshylar saýda baılanystary men ınvestıtsııalyq yntymaqtastyqty keńeıtý máselelerin talqylady. Ónerkásipte, tsıfrlyq, energetıkalyq, aýyl sharýashylyǵy, kólik-logıstıkalyq, sý jáne taǵy da basqa salalarda ózara is-qımyldy tereńdetý jónindegi sharalar qaraldy.
Ekijaqty yntymaqtastyqty damytý perspektıvalary týraly Premer-mınıstrdiń orynbasary – Ulttyq ekonomıka mınıstri Serik Jumanǵarın, saýda jáne ıntegratsııa mınıstri Arman Shaqqalıev, energetıka mınıstri Erlan Aqkenjenov, kólik mınıstri Nurlan Saýranbaevtar baıandama jasady.
Kólik-tranzıt salasyndaǵy jańa túıisý núktelerine nazar aýdaryldy.
Energetıka sektorynda birlesken jobalar sheńberinde ozyq tehnologııalardy jańǵyrtý men engizýdiń mańyzdylyǵy atap ótildi.
AÓK salasyndaǵy áriptestik mańyzdy baǵyt bolyp sanalady. Qazaqstan álemdegi astyq pen undy eń iri eksporttaýshylardyń ondyǵyna kiredi. Osy rette astyqty tereń óńdeı otyryp, odan ári AQSh, EO, Qytaı jáne Úndistan naryqtaryna eksporttaý boıynsha birlesken jobalar talqylandy.
Tsıfrlyq ındýstrııa jáne JI tehnologııalary salasyndaǵy ózara is-qımyldy tereńdetý basym baǵyt bolyp aıqyndaldy. Oǵan aımaqtaǵy basty alań retinde Alem.AI halyqaralyq jasandy ıntellekt ortalyǵy alynyp otyr. Ol Apple, Google jáne taǵy da basqa alpaýyttardyń qosa alǵanda álemdegi jetekshi tehnologııalyq kompanııalardyń basyn biriktiredi.
Elimizdiń tsıfrlyq ekojúıesiniń mańyzdy elementi – Astana Hub, onda búginde 1700-den astam kompanııa jumys istep jatyr. Kalıfornııa shtatynda (AQSh) Qazaqstan Silk Road ınnovatsııalyq ortalyǵyn ashty. AQSh-tyń jetekshi kompanııalarymen jáne joǵary oqý oryndarymen birlese otyryp QR men AQSh arasyndaǵy tehnologııalyq áriptestikti nyǵaıtatyn akseleratsııalyq baǵdarlamalar júzege asyrylyp jatyr.
Kezdesý qorytyndysynda qatysýshylar barlyq perspektıvaly baǵyt boıynsha saýda-ekonomıkalyq yntymaqtastyqty keńeıtýge daıyn ekenin rastady.
Buǵan deıin Memleket basshysy AQSh Prezıdentiniń Ońtústik jáne Ortalyq Azııa boıynsha arnaıy ókili Serdjıo Gormen jáne AQSh Memlekettik hatshysynyń birinshi orynbasary Krıstofer Landaýmen kezdesti.
Kezdesýde Vashıngtonda ótetin S5+1 sammıti qarsańynda qazaq-amerıka keńeıtilgen strategııalyq seriktestigin damytý perspektıvasy talqylandy.