Qazaqstan men AQSh prezıdentteri Bınıamın Netanıahýmen telefon arqyly sóılesti

VAShINGTON. KAZINFORM — Aq úıdegi kezdesý barysynda Qazaqstan men AQSh prezıdentteri Izraıl Premer-mınıstri Bınıamın Netanıahýmen telefon arqyly sóılesti, dep habarlaıdy Aqordanyń baspasóz qyzmeti.

Qazaqstan Respýblıkasynyń Ibrahım kelisimderine qosylýy áńgimelesýdiń arqaýy boldy.

Memleket basshysy Prezıdent Tramptyń Taıaý Shyǵysta beıbit ómir ornatýǵa naqty alǵysharttar jasap, kópshilik kúmánmen qarasa da, eleýli nátıjelerge qol jetkizgenine nazar aýdardy.

Ibrahım kelisimderine qosylý arqyly Qazaqstan qaqtyǵysty eńserýge, dıalogty ilgeriletýge jáne BUU Jarǵysy negizindegi halyqaralyq quqyqty qoldaýǵa úles qosady.

Qazaqstannyń bul sheshimi eshbir memleketpen ekijaqty qatynastardaǵy mindettemelerine nuqsan keltirmeıdi. Bul — beıbitshilik pen qaýipsizdikti nyǵaıtýdy kózdegen kópjaqty dıplomatııanyń zańdy jalǵasy ári naqty kórinisi.

AQSh prezıdenti Donald Tramp Qazaqstannyń Ibrahım kelisimderine qosylý týraly sheshimin joǵary baǵalap, bul qadam ózge elderdi atalǵan bastamany qoldaýǵa úndeıtinin atap ótti.

— Bul — búkil álemde yntymaqtastyq ornatýda aıtarlyqtaı alǵa ilgerileý. Búginde kóptegen el Ibrahım kelisimderi arqyly beıbitshilik pen órkendeý jolyn tańdap otyr, — dedi Donald Tramp.

Buǵan deıin Memleket basshysy Qasym-Jomart Toqaev pen AQSh Prezıdenti Donald Tramp kezdesýiniń nátıjesi jarııalandy. Aq úıdegi kezdesýde Memleket basshysy Vashıngtonǵa saparmen kelýge shaqyrǵany jáne qazaqstandyq delegatsııaǵa kórsetken qonaqjaı kóńili úshin AQSh Prezıdentine rızashylyq bildirdi.