Qazaqstan men AQSh parlamenttik dıplomatııany kúsheıtpek
ASTANA. KAZINFORM — Prezıdent Qasym-Jomart Toqaev AQSh Ókilder palatasynyń Bıýdjet jáne salyq jónindegi komıtetiniń tóraǵasy Djeıson Smıtpen, sondaı-aq Kongress músheleri Greg Merfımen, Kerol Mıllermen, Ronnı Djeksonmen, Ýeslı Bellmen jáne Edvard Keıspen kezdesti. Bul týraly Aqorda málim etti.
Memleket basshysy meımandarǵa iltıpat bildirip, olardyń bir palataly Quryltaı saılaýymen tuspa-tus ótip jatqan saparynyń sımvoldyq mánine nazar aýdardy.
Qazaqstan Prezıdentiniń aıtýynsha, parlament saılaýy elimizdegi saıası jańǵyrýdyń jańa kezeńi bastalǵanyn aıshyqtaıtyn tarıhı ýaqıǵa boldy. Bir palataly Quryltaı zań shyǵarý úderisiniń tıimdiligi men zańdardyń sapasyn arttyrady.
Memleket basshysy parlamenttik dıplomatııa jańa organnyń qyzmetindegi mańyzdy baǵyt bolatynyn atap ótti.
— AQSh Kongresi men Quryltaı músheleri arasyndaǵy konstrýktıvti ári mazmundy dıalog ózara túsinistikti tereńdetip, ortaq basymdyqtardy ilgeriletý jáne qazaq-amerıka seriktestigin nyǵaıtý turǵysynan aıryqsha mánge ıe, — dedi Prezıdent.
Qasym-Jomart Toqaev amerıkalyq delegatsııaǵa elimizde júrgizilip jatqan aýqymdy saıası, áleýmettik-ekonomıkalyq reformalar, sondaı-aq ádiletti, ozyq memleket qurýdy kózdeıtin strategııalyq baǵdarymyzdy iske asyrý aıasynda basqarý júıesin jańǵyrtýdyń basymdyqtary jóninde málimet berdi.
Prezıdent Kongress múshelerin elimizdiń jalpyhalyqtyq qoldaýǵa ıe bolǵan jańa Konstıtýtsııasyndaǵy negizgi aspektilermen tanystyrdy.
Sonymen qatar Memleket basshysy san qyrly qazaq-amerıka seriktestigi saýda-ekonomıkalyq jáne ınvestıtsııalyq yqpaldastyq, ozyq tehnologııalar, ǵylym, bilim jáne mádenıet salalaryndaǵy yntymaqtastyqqa basa mán bere otyryp, qarqyndy damyp kele jatqanyna toqtaldy.
Memleket basshysy Prezıdent Donald Tramppen konstrýktıvti ári senimdi dıalogtyń arqasynda eki eldiń qarym-qatynasy buryn-sońdy bolmaǵan deńgeıge kóterilgenin aıtty.
Kópjaqty formatta da jemisti yntymaqtastyq ornady. Munyń aıqyn dáleli — Qazaqstan Amerıkanyń jahandyq jáne óńirlik turaqtylyqty nyǵaıtý bastamalaryna, sonyń ishinde Beıbitshilik keńesi men Ibrahım kelisimderine qoldaý bildirdi.
Bul rette Prezıdent Qazaqstan men AQSh ıadrolyq qaýipsizdikti nyǵaıtý jáne jappaı qyryp-joıý qarýyn taratpaý isinde de mańyzdy ról atqaratynyna nazar aýdardy.
Aıta keteıik, buǵan deıin Qasym-Jomart Toqaev Táýelsizdik saraıynda Halyqaralyq basketbol federatsııasynyń prezıdenti Saýd Alı Ál-Tánımen kezdesý ótkizdi.
