Qazaqstan men AQSh mádenı muralardy saqtaý jóninde ýaǵdalasty
ASTANA. QazAqparat - Amerıka Qurama Shtattarynyń sheteldegi amerıkalyq murany saqtaý jónindegi Komıssııasynyń tóraǵasy Pol Parker jáne Qazaqstan Respýblıkasynyń mádenıet jáne sport mınıstri Arystanbek Muhamedıuly Qazaqstandaǵy mádenı murany saqtaý boıynsha ózara túsinistik týraly memorandýmǵa qol qoıdy. Bul týraly AQSh elshiligine silteme jasap QazAqparat habarlaıdy.
Memorandým Amerıka Qurama Shtattary jáne Qazaqstan aýmaǵynda turatyn nemese ómir súrgen barlyq ulttyq, dinı jáne etnıkalyq toptardyń, sonymen qatar Ekinshi Dúnıejúzilik soǵys kezindegi genotsıd qurbandarynyń muralaryn saqtaý boıynsha birlese atqarylatyn istiń bastamasy bolmaq.
Bul memorandým - mádenı murany saqtaý salasyndaǵy yntymaqtastyqtyń negizi jáne ol eki el arasyndaǵy mádenı-gýmanıtarlyq yntymaqtastyqty nyǵaıtady.
«Bolashaq urpaǵymyz úshin mádenı muralardy saqtaýdy kózdegen ortaq umtylysymyzda birlese alamyz dep senemin», - degen Pol Parker myrza qujatqa qol qoıdy.
Amerıka Qurama Shtattarynyń sheteldegi amerıkalyq murany saqtaý jónindegi Komıssııasynyń tóraǵasy Pol Parker Qazaqstanǵa alǵash ret Astanada ótip jatqan Álemdik jáne dástúrli dinder kóshbasshylarynyń altynshy sezine qatysý úshin keldi.
