Qazaqstan men AQSh energetıka, tehnologııa jáne ınvestıtsııa salalaryndaǵy baılanysty keńeıtedi
ASTANA. KAZINFORM - Qazaqstan Respýblıkasy Syrtqy ister mınıstri Ermek Kósherbaev AQSh Memlekettik hatshysynyń Ońtústik jáne Ortalyq Azııa isteri jónindegi kómekshisi Pol Kapýrdy qabyldady, dep habarlaıdy QR Syrtqy ister mınıstrliginiń baspasóz qyzmeti.
Kezdesý barysynda taraptar ekijaqty yntymaqtastyqtyń ózekti máselelerin, sondaı-aq Qazaqstan men AQSh arasyndaǵy keńeıtilgen strategııalyq áriptestikti odan ári nyǵaıtýdyń perspektıvalaryn talqylady.
E.Kósherbaev suhbattasyn Qazaqstanda júzege asyrylyp jatqan saıası jáne áleýmettik-ekonomıkalyq ózgerister týraly habardar etip, eldiń damýdaǵy jańa kezeńge qadam basqanyn atap ótti. Osyǵan baılanysty 23 tamyzda ótetin Quryltaı saılaýy jańa konstıtýtsııalyq modeldi is júzinde iske asyrýdaǵy mańyzdy kezeń bolatyny aıtyldy.
Óz kezeginde, amerıkalyq tarap yntymaqtastyqty odan ári nyǵaıtýǵa múddeliligin rastady jáne energetıka, mańyzdy mıneraldar, ozyq tehnologııalar, tsıfrlandyrý, kólik jáne ınvestıtsııalar salalaryndaǵy praktıkalyq ózara is-qımyldy keńeıtý úshin eleýli áleýet bar ekenin atap ótti.
Sý resýrstaryn basqarýdyń jahandyq arhıtektýrasyn nyǵaıtý jónindegi Qazaqstannyń bastamasyna, onyń ishinde Qazaqstan Respýblıkasy Prezıdenti Qasym-Jomart Toqaevtyń BUU-nyń mamandandyrylǵan mekemesi retinde Halyqaralyq sý uıymyn qurý týraly bastamasyna erekshe nazar aýdaryldy.
Kezdesý barysynda sondaı-aq 2026 jylǵy jeltoqsanda Maıamı qalasynda ótetin «G20» sammıtine daıyndyq máseleleri jóninde pikir almasyldy.
Sammıtke Memleket basshysy AQSh Prezıdenti Donald Tramptyń shaqyrýymen qatysady. Osyǵan baılanysty taraptar joǵary deńgeıdegi kún tártibin mazmundy túrde qalyptastyrý maqsatynda odan ári ózara is-qımyl jasaýǵa daıyn ekenderin bildirdi.
Osyǵan deıin AQSh-tyń Transkaspıı bastamasy qoryna 201 mln dollar ınvestıtsııa salatyny týraly jazdyq.
