Qazaqstan men AQSh energetıka salasyndaǵy yntymaqtastyqty kúsheıtpek
ASTANA. KAZINFORM — Energetıka mınıstri Erlan Aqkenjenov AQSh-tyń Tótenshe jáne ókiletti elshisi Djýlı Stafftpen kezdesý ótkizdi.
Dıplomatııalyq dıalog barysynda taraptar ekijaqty is-qımyldyń keń aýqymdy máselelerin talqylap, energetıkalyq seriktestikti nyǵaıtýǵa beıildilikterin rastady.
Kelissózderdiń negizgi baǵyty óńirlik energetıkalyq qaýipsizdikti qamtamasyz etý jáne álemdik naryqtarǵa shyǵatyn eksporttyq baǵyttardyń turaqty jumysyn saqtaý boldy. Bul turǵyda eki eldiń ekonomıkalyq qatynastarynyń irgetasy sanalatyn energetıka salasyndaǵy ekijaqty yntymaqtastyqtyń strategııalyq mańyzy erekshe atap ótildi.
Teńiz, Qashaǵan jáne Qarashyǵanaq syndy iri munaı-gaz jobalaryn júzege asyrýda negizgi seriktes bolyp tabylatyn AQSh-tyń «Chevron» jáne «ExxonMobil» sııaqty iri korporatsııalarymen syndarly áriptestikke basa nazar aýdaryldy.
Sonymen qatar, taraptar kómir salasyn damytý, onyń ishinde kómirdi tereń óńdeý jáne kómir hımııasy salasynyń perspektıvalaryn egjeı-tegjeıli talqylady.
Búgingi tańda tıisti Jol kartasy bekitilgen, onyń aıasynda halyqaralyq jáne otandyq kompanııalardyń qatysýymen ammıak, karbamıd, sıntetıkalyq gaz jáne dızel otynyn óndirý boıynsha jobalardy iske asyrý josparlanyp otyr. Qazaqstan kómir generatsııasynyń tıimdiligin arttyrýǵa jáne ekologııalyq áserdi azaıtýǵa baǵyttalǵan «taza kómir» salasyndaǵy yntymaqtastyqty damytýǵa múddeli ekenin bildirdi.
Kezdesý sońynda taraptar eki eldiń energetıkalyq kesheniniń ınvestıtsııalyq tartymdylyǵyn arttyrýǵa septigin tıgizetin Strategııalyq energetıkalyq yntymaqtastyq aıasyndaǵy belsendi dıalogty jalǵastyrý nıetin naqtylady.
Aıta ketelik álemde munaı baǵasy 2022 jyldan bergi eń joǵary deńgeıge jetkeni týraly jazǵan edik.
