Qazaqstan men AQSh dıplomatııalyq baılanystardy nyǵaıtýǵa negizdelgen qujatty bekitti
NUR-SULTAN. QazAqparat - Búgin elordada Qazaqstan men AQSh Úkimeti arasynda konsýldyq artyqshylyqtar men ımmýnıtetter týraly kelisimge qol qoıyldy, dep habarlaıdy QazAqparat tilshisi.
Atalǵan qujatty QR Syrtqy ister mınıstriniń orynbasary Erjan Ashyqbaev pen AQSh-tyń Qazaqstandaǵy Tótenshe jáne Ókiletti Elshisi Ýılıam Mozer bekitti.
«Qazirgi tańda Qazaqstan men AQSh arasyndaǵy keńeıtilgen strategııalyq qatynastar qarqyndy damýda. Oǵan eń joǵary dárejedegi turaqty saıası suhbat óz ıgiligin tıgizgeni málim. Ózderińizge málim bolǵandaı, 2018 jyldyń qańtarynda QR Tuńǵysh Prezıdenti Nursultan Nazarbaev AQSh-qa resmı saparmen baryp, osy ekijaqty qatynastarymyzdy keńeıtilgen strategııalyq áriptestik deńgeıine shyǵarý týraly ýaǵdalastyqqa qol jetkizgen bolatyn. Osy kelisim Qazaqstan men AQSh-tyń konsýldyq laýazymdy tulǵalardy jáne olardyń otbasy múshelerin dıplomatııalyq ımmýnıtettermen, artyqshylyqtarmen qamtamasyz etýge baılanysty máselelerdi rettep, bul óz kezeginde atalmysh konsýldyq laýazymdy tulǵalardyń qyzmetine oń áser tıgizetin bolady», - dedi Erjan Ashyqbaev.
Aıta keteıik, búginde AQSh aýmaǵynda Qazaqstannyń eki bas konsýldyǵy jumys atqarýda. Olardyń biri Nıý-Iork qalasynda bolsa, ekinshisi San-Frantsısko qalasyndaǵy Qazaqstannyń bas konsýldyǵy.
Óz kezeginde Ýılıam Mozer eki el aýmaǵynda qyzmet etip júrgen dıplomattar úshin tolyq ımmýnıtetter men artyqshylyqtardy qamtamasyz etý baǵytynda tıisti qadam jasap otyrǵanyn atap ótti.
«Qazaqstan men AQSh tyǵyz ekijaqty qatynastardy qamtamasyz etý úshin birazdan beri birqatar bastamalardy iske asyrýǵa qatysty. Sonymen qatar, Qazaqstannyń AQSh aýmaǵynda dıplomatııalyq qatysýyn keńeıtý múddesin qoldaımyz. Osy oraıda Qazaqstandyq dıplomattar úshin artyqshylyqtar men ımmýnıtetterdi qamtamasyz etý - ınvestıtsııa tartý arqyly ekonomıkany damytý men ekijaqty baılanystardy ary qaraı nyǵaıtýǵa yqpal etetini sózsiz», - dedi AQSh Elshisi.
