Qazaqstan men AQSh bıznesi jańa seriktestikke qadam baspaq
ASTANA. KAZINFORM - Astanada ótip jatqan Qazaqstan–AQSh iskerlik dóńgelek ústelinde eki eldiń bıznes qaýymdastyǵy arasyndaǵy yntymaqtastyqty keńeıtý máseleleri talqylandy.
Іs-shara aıasynda «Atameken» UKP men AQSh Saýda palatasy arasynda strategııalyq áriptestik týraly memorandýmǵa qol qoıý josparlanǵan. Bul týraly «Atameken» UKP tóraǵasynyń orynbasary, Qazaqstannyń Syrtqy saýda palatasynyń tóraǵasy Murat Qarymsaqov aıtty.
-Búgingi dóńgelek ústel aıasynda Ulttyq kásipkerler palatasy men AQSh Saýda palatasy arasynda strategııalyq áriptestik týraly memorandýmǵa qol qoıylady. Bul – amerıkalyq kompanııalarmen iskerlik baılanysty keńeıtýge, yntymaqtastyqtyń jańa baǵyttaryn aıqyndaýǵa jáne shaǵyn ári orta bıznes úshin qosymsha múmkindikter ashýǵa baǵyttalǵan mańyzdy qujat, – dedi ol.
Onyń aıtýynsha, amerıkalyq delegatsııa quramynda Qazaqstanda jumys istep júrgen jáne el ekonomıkasyna ınvestıtsııa salýǵa nıetti jetekshi kompanııalar bar. Olardyń qatarynda energetıka, tehnologııa, qarjy, ónerkásip jáne kólik-logıstıka salalarynyń ókilderi qatysyp otyr.
-Búgin quramynda iri kompanııalar bar delegatsııa jınalyp otyr. Onyń quramynda Qazaqstanda jumys istep júrgen, sondaı-aq aldaǵy ýaqytta el ekonomıkasyna ınvestıtsııa salýdy josparlap otyrǵan amerıkalyq kompanııalar bar. Bul – energetıka, IT, qarjy, ónerkásip, aýyl sharýashylyǵy jáne kólik-logıstıka baǵyttaryndaǵy iri bıznes ókilderi. Biz amerıkalyq áriptestermen ónerkásiptik jáne aýyl sharýashylyǵy kooperatsııasyn, logıstıkalyq jobalardy keńeıtýdi kózdep otyrmyz, – dedi Murat Qarymsaqov.
Dóńgelek ústelde Qazaqstannyń ınvestıtsııalyq múmkindikteri, kólik-logıstıka, jańa energetıka, ónerkásiptik kooperatsııa jáne damý ınstıtýttarynyń jobalary tanystyrylady.
AQSh Qazaqstan ekonomıkasyna 60 mlrd dollardan astam ınvestıtsııa saldy.
