Qazaqstan men AQSh avıatsııalyq bilim berý salasyndaǵy yntymaqtastyqty nyǵaıtady
ASTANA. KAZINFORM – Azamattyq avıatsııa akademııasy men AQSh-tyń Kent State University ýnıversıteti arasynda halyqaralyq akademııalyq yntymaqtastyqty damytý maqsatynda ózara túsinistik týraly memorandýmǵa qol qoıyldy. Bul týraly Ǵylym jáne joǵary bilim mınıstrligi habarlady.
Qujatqa Kent State University ýnıversıtetiniń prezıdenti Todd Daıakon men Azamattyq avıatsııa akademııasynyń Basqarma tóraǵasy jáne rektordyń mindetin atqarýshy Qaırat Jaqypov qol qoıdy.
Memorandým taraptar arasyndaǵy yntymaqtastyqty keńeıtýge jáne avıatsııa salasynyń mamandaryn daıarlaý, sondaı-aq ǵylymı-bilim berý jobalaryn birlesip júzege asyrýǵa baǵyttalǵan. 2025-2026 jyldar aralyǵynda áriptestik aıasynda júıeli jumys júrgizilip, bilim berý baǵdarlamalaryn almastyrý jáne yntymaqtastyqtyń yqtımal baǵyttary talqylandy.
Uıymdastyrylǵan jumystar barysynda eki tarap bilim berý ádisteriniń negizgi quzyretteri boıynsha uqsastyǵyn atap ótip, yntymaqtastyqty turaqty damytýǵa kelisimge keldi. Memorandýmǵa qol qoıý osy dıalogtyń jalǵasy retinde birlesken jobalardy iske asyrýǵa múmkindik beredi.
Yntymaqtastyqty odan ári nyǵaıtý 2026 jylǵy qańtarda QR Ǵylym jáne joǵary bilim mınıstri Saıasat Nurbek pen Kent State University ýnıversıtetiniń jahandyq bilim berý jónindegi vıtse-prezıdenti Marchello Fantonıdiń kelissózderi barysynda talqylandy. Kelissózderde qos dıplom baǵdarlamalaryn engizý, Halyqaralyq avıatsııa ýnıversıtetiniń tujyrymdamasyn ázirleý, akademııalyq utqyrlyqty arttyrý jáne birlesken ǵylymı-zertteý jumystaryn júrgizý máseleleri qaraldy.
Alǵashqy kezeńde ushqyshsyz avıatsııalyq júıeler, áýe qozǵalysyn uıymdastyrý jáne qyzmet kórsetý, áýe kemelerin tehnıkalyq paıdalaný baǵyttary boıynsha birlesken bilim berý baǵdarlamalaryn ázirleý jáne iske qosý josparlanǵan. Bul kezeń bilim berý sheshimderin úılestirýge jáne stýdentterdiń akademııalyq utqyrlyǵyn damytýǵa baǵyttalǵan.
Taraptar yntymaqtastyqty keńeıtip, keshendi bilim berý bastamalaryn pysyqtaýdy qarastyrady. Sonymen qatar ǵylymı-zertteý salasynda avıatsııalyq tehnologııalar, turaqty damý jáne salany tsıfrlandyrý baǵyttarynda birlesken jobalardy iske asyrý múmkindikteri qaralady.
Barlyq bastama akademııalyq, uıymdastyrýshylyq jáne retteýshilik talaptardy eskere otyryp kezeń-kezeńimen júzege asyrylady. Bul rette biliktilikterdi taný, bilim berý standarttaryn úılestirý jáne normatıvtik retteý máseleleri tıisti memlekettik organdardyń qatysýymen retteledi.
Azamattyq avıatsııa akademııasy men Kent State University arasyndaǵy memorandým eki eldiń bilim jáne ǵylym salasyndaǵy uıymdary arasyndaǵy uzaq merzimdi áriptestikti nyǵaıtýǵa, tájirıbe almasýǵa jáne mamandar daıarlaý sapasyn arttyrýǵa múmkindik beredi.
Osyǵan deıin Qazaqstan avıatsııa salasynda kadr daıarlaýdyń jańa kezeńine qadam basqanyn jazǵanbyz.
