Qazaqstan men AQSh arasynda vızalyq rejimderdi jeńildetý jumysy jalǵasa beredi

ASTANA. QazAqparat  - QR Syrtqy ister mınıstrligi Qazaqstan men AQSh arasyndaǵy vızalyq rejimdi jeńildetý jumysyn júrgize bermek. Bul týraly Memleket basshysy Nursultan Nazarbaevtyń AQSh-qa jasaǵan resmı saparynyń qorytyndysy boıynsha Astanada baspasóz máslıhatyn ótkizgen QR Syrtqy ister vıtse-mınıstri Erjan Ashyqbaev málim etti, dep habarlaıdy «QazAqparat» HAA tilshisi.

«Sapar qorytyndysynyń ekonomıkalyq yntymaqtastyǵymyzǵa qalaı áser etetinin aıtar bolsaq, bul AQSh Prezıdenti Donald Tramptyń sapar nátıjeleri boıynsha jasaǵan málimdemesinde anyq baıqalǵanyndaı, eń aldymen AQSh Qazaqstandaǵy ózgeristerdi, modernızatsııalyq úrdisterdi tolyǵymen qoldaıdy. Bul - bir. Ekinshiden, AQSh ákimshiligi amerıkalyq kompanııalarǵa Qazaqstanmen yntymaqtastyqty damytýda barynsha qoldaý jasaýǵa múddeli ekenin de bildirdi. Úshinshiden, árıne, sapar nátıjeleri málimdemede baıqalǵandaı, ekijaqty ǵana emes, sondaı-aq ekonomıkalyq uıymdar aıasynda da yntymaqtastyqty damytýda ýaǵdalastyqqa qol jetkizildi», - deıdi QR Syrtqy ister vıtse-mınıstri.

Erjan Ashyqbaevtyń aıtýynsha, eki el arasynda vızalyq rejimge baılanysty kelisimder bar.

«Vızalyq jeńildikter boıynsha aıtar bolsaq... Qazirgi kezde Qazaqstan azamattary Amerıkaǵa 10 jyldyq vıza alýǵa quqyly. Basqa eldermen salystyrǵanda, Eýropa odaǵynyń shengen vızalaryn alý úshin qandaı qıyndyqtar bary ózderińizge málim. Amerıkalyq áriptesterimizben biz 2016 jyldan bastap turaqty negizde 10 jyldyq vızalardy berýge qol jetkizgen bolatynbyz. Bul basymdyq qazaqstandyq tarapqa kelgende isker bıznes ókilderine, oqýshylarǵa, týrısterge beriledi. Qazaqstan tarapy ekonomıkalyq yntymaqtastyq jáne damý uıymyna múshe memleketterge berilgen jeńildikter aıasynda belgili bir merzimge deıin vızasyz rejimdi berip otyr», - deıdi ol.

QR Syrtqy ister vıtse-mınıstri vızalyq rejimdi ary qaraı jeńildetý máselesi kóteriletinin atap ótti.

«Bul bizdiń syrtqy saıasatymyzdyń kún tártibindegi naqty tapsyrmalarynyń biri. Alaıda qazirgi kezde bizdiń azamattardyń AQSh vızasyn alýda úlken qıyndyqtary týyp otyr dep aıta almaımyz. Vızalar kelisilgen sharttar boıynsha berilip otyr. Biraq, áli de vızalyq talaptardy jeńildetýge tyrysamyz. Bul, árıne, AQSh-taǵy ishki saıasatynyń úrdisterine baılanysty bolǵanyn eske sala keteıin. AQSh-ta qazirgi kezde mıgratsııaǵa kelgende ishki dıskýssııa júrip jatyr», - deıdi ol.