Qazaqstan men AQSh arasynda tikeleı áýe qatynasy ashylýy múmkin
Bul týraly QR Indýstrııa jáne ınfraqurylymdyq damý mınıstrligi Azamattyq avıatsııa komıtetiniń tóraǵasy Talǵat Lastaevtyń Boeing kompanııasynyń vıtse-prezıdenti Monte Freızermen kezdesýinen málim boldy, dep habarlaıdy QazAqparat.
QR Indýstrıch jáne ınfraqurylymdyq damý mınıstrligi baspasóz qyzmetiniń habarlaýynsha, kezdesýde Boeing 737 MAX jáne 787 Dreamliner áýe kemelerin Air Astana jáne SCAT áýe kompanııalaryna jetkizý máseleleri talqylandy.
Keıin T.Lastaev pen M.Freızer QR men AQSh arasynda tikeleı áýe qatynasyn ashý, sondaı-aq Qazaqstanda Boeing kompanııasynyń jattyǵý jáne tehnıkalyq ortalyqtaryn ornalastyrý múmkindigine qatysty máselelerdi talqylady.
Sondaı-aq eki tarap Boeing kompanııasynyń AQSh Federaldyq azamattyq avıatsııa basqarmasynyń (FAA) Ushý qaýipsizdigin halyqaralyq baǵalaýynan (IASA) jedel ótý úshin Qazaqstannyń avıatsııalyq ákimshiligine óteýsiz tehnıkalyq kómek berý jáne QR men AQSh arasyndaǵy tikeleı reısti iske qosý úshin CAT1 mártebesin alý týraly ýaǵdalasty.
Álemdik tájirıbeni negizge alatyn bolsaq, arnaıy konsaltıngtik kompanııalardyń tehnıkalyq turǵydan qoldaý kórsetýiniń ortasha quny shamamen $2-2,5 mln quraıdy. Qol jetkizilgen ýaǵdalastyqtar sheńberinde bıyl mamyr aıynyń úshinshi onkúndiginde Boeing mamandary Nur-Sultan qalasyna keledi.
Sonymen qatar, kezdesýge qatysýshylar Qazaqstanda azamattyq avıatsııa salasyndaǵy jas talanttarǵa arnalǵan Boeing kompanııasynyń arnaıy oqytý baǵdarlamasyn uıymdastyrý týraly kelisimge qol jetkizdi.
