Qazaqstan men AQSh arasynda áýe qozǵalysy týraly kelisimge qol qoıylmaq
ASTANA. QazAqparat - QR Úkimeti men AQSh Úkimeti arasynda «ashyq aspan» qaǵıdaty boıynsha áýe qozǵalysyn jandandyrý týraly kelisimge qol qoıý boıynsha jumystar aıaqtalyp qaldy. Bul týraly QR Indýstrııa jáne ınfraqurylymdyq damý mınıstrliginiń Azamattyq avıatsııa komıtetine silteme jasap, QazAqparat tilshisi habarlaıdy.
2018 jyldyń 21 qyrkúıeginde Vashıngtonda Qazaqstan men AQSh avıatsııalyq bıligi arasynda ekijaqty kelissóz ótken.
«Qazirgi ýaqytta amerıkandyq tarappen qol qoıýǵa josparlanǵan áýe qozǵalysy týraly úkimetaralyq kelisimniń mátinin kelisý rásimi aıaqtalyp qaldy. Osy kelisimge qol qoıý - Qazaqstan men AQSh arasynda tikeleı áýe reısterin ashýǵa quqyqtyq negiz bolady», - delingen habarlamada.
Eske sala ketsek, keshe Elbasy Nursultan Nazarbaev Úkimettiń keńeıtilgen otyrysynda Indýstrııa jáne ınfraqurylymdyq damý mınıstri Jeńis Qasymbekke Amerıka Qurama Shtattary men Japonııaǵa tikeleı áýe reısin ashý máselesi bıyl sheshilýi kerektigin tapsyrǵan bolatyn.
Al arada kóp ótpeı Azamattyq avıatsııa komıteti Qazaqstannan Japonııaǵa tikeleı reısti bıyl ashý boıynsha jumystar júrgizilip jatqanyn habarlaǵan bolatyn.
