Qazaqstan men AQSh arasyndaǵy avıatsııalyq yntymaqtastyq jańa deńgeıge kóterildi
ASTANA. KAZINFORM – AQSh Memlekettik departamenti Qazaqstan men Amerıka Qurama Shtattary arasyndaǵy avıatsııa salasyndaǵy yntymaqtastyqtyń mańyzyn resmı túrde atap ótti.
Memlekettik «Qazaeronavıgatsııa» kásiporny ulttyq áýe qozǵalysyn basqarý júıesin aýqymdy jańǵyrtýǵa kirisip, amerıkalyq Leidos kompanııasymen jasalǵan 19 jyldyq kelisim aıasynda SkyLine-X platformasyna kóshýdi bastady.
Atalǵan joba Qazaqstan men AQSh arasyndaǵy joǵary tehnologııaly yntymaqtastyqtyń negizgi úlgileriniń biri sanalady jáne Vashıngtonda ótken Qazaqstan Prezıdenti Qasym-Jomart Toqaev pen AQSh Prezıdenti Donald Tramptyń kezdesýi barysynda resmı túrde atap ótildi.
Kelisimdi daıyndaý sońǵy jyldardaǵy sala úshin eń kúrdeli protsesterdiń biri boldy jáne dıplomatııalyq jumysty, saraptamalyq baǵalaýdy ári ınstıtýtsıonaldyq kemeldilikti talap etti.
«Qazaqstan óńirdegi eń aýqymdy áýe keńistikteriniń birin basqarady, al júıeniń senimdiligi – qaýipsizdiktiń basty faktory. Jańǵyrtý bizge senimdi túrde alǵa jyljýǵa jáne qyzmet kórsetý sapasyn álemdegi jetekshi ortalyqtar deńgeıinde qamtamasyz etýge múmkindik beredi», – dedi «Qazaeronavıgatsııa» bas dırektory Faat Farıtovıch.
AQSh tarapy da Memlekettik departamenttiń resmı materıaldarynda bul jobanyń mańyzyn atap ótip, ony avıatsııa, tsıfrlyq tehnologııalar jáne kólik ınfraqurylymyna salynǵan ınvestıtsııalarmen qatar strategııalyq seriktestikti tereńdetýdiń mańyzdy elementi retinde atady. SkyLine-X platformasyna kóshý aeronavıgatsııalyq ınfraqurylymdy keshendi jańartýdy kózdeıdi. Bul jabdyqtardy jańǵyrtýdy, áýe keńistigin avtomattandyrylǵan monıtorıngteýdi, marshrýttardy dálirek boljaýdy jáne dıspetcherlik ortalyqtar arasyndaǵy úılestirý sapasyn arttyrýdy qamtıdy.
«Qazaeronavıgatsııa» RMK – Qazaqstan Respýblıkasynyń azamattyq avıatsııasyna aeronavıgatsııalyq qyzmet kórsetetin memlekettik kásiporyn. Kásiporyn eldiń avıatsııa salasyndaǵy júıe quraýshy uıym jáne áýe qozǵalysyn basqarýǵa, ushý qaýipsizdigin qamtamasyz etýge, halyqaralyq standarttardyń saqtalýyna jáne Qazaqstannyń áýe keńistiginiń turaqty jumysyna jaýap beredi.
Aıta keteıik, Qazaqstan men Frantsııa azamattyq avıatsııa salasynda kadr daıarlaý boıynsha kelisimge keldi.