Qazaqstan men AQSh arasynda tikeleı reıs ashylýy múmkin
ASTANA. KAZINFORM — Monreal qalasynda ótip jatqan IKAO-nyń áýe kóligi jónindegi 7-shi Dúnıejúzilik konferentsııasy (ATConf/7) aıasynda QR Kólik vıtse-mınıstri Talǵat Lastaev pen AQSh delegatsııasynyń basshysy, AQSh Kólik mınıstriniń avıatsııa jáne halyqaralyq qatynastar jónindegi assıstenti Denıel Dj. Edvardstyń kezdesýi ótti.
Kelissózderdiń negizgi taqyryby Qazaqstan men AQSh arasynda tikeleı áýe qatynasyn ornatý perspektıvalary, sondaı-aq azamattyq avıatsııa salasyndaǵy ekijaqty yntymaqtastyqty odan ári damytý máseleleri boldy.
Kezdesý barysynda Qazaqstan Prezıdentiniń osy jyldyń jeltoqsan aıynda Maıamı qalasynda (AQSh) ótetin G20 sammıtine shaqyrylǵany atalyp ótti.
Qazirgi ýaqytta qazaqstandyq tarap AQSh Federaldyq avıatsııalyq basqarmasynyń (FAA) 1-sanatyn alý boıynsha jumystardy jalǵastyryp jatyr. Qyrkúıek aıynda amerıkalyq sarapshylar aýdıt júrgizip, jaqsy kórsetkishterdi atap óte otyryp, aldyn ala nátıjelerdi usyndy.
Sondaı-aq áńgime barysynda 2027 jyldyń sońyna deıin Qazaqstan men AQSh arasynda tikeleı reıs ashý josparlary sóz boldy.
– Biz Qazaqstan men AQSh arasynda tikeleı áýe qatynasyn iske qosýǵa múddelimiz jáne osy baǵytta belsendi jumys júrgizýdemiz. Elderimiz arasynda jasalǵan «Ashyq aspan» týraly kelisim osy bastamany iske asyrý úshin berik quqyqtyq negiz qalyptastyrady. Biz AQSh-tyń avıatsııalyq bılik organdarymen syndarly ózara is-qımyldy joǵary baǵalaımyz jáne qalǵan rásimderdiń taıaý bolashaqta aıaqtalýyna senim artamyz, – dep atap ótti Talǵat Lastaev.
QR Azamattyq avıatsııa komıteti málimetinshe, kezdesýde qazaqstandyq áýe kompanııalarynyń áýe kemeleri parkin jańartý máselesi de atalyp ótti. Máselen, Air Astana áýe kompanııasy 2026–2027 jyldary AQSh-qa ushýlardy uıymdastyrý kezinde paıdalaný josparlanyp otyrǵan úsh Boeing 787 Dreamliner áýe kemesiniń jetkizilýin kútip otyr.
Budan bólek, 2025 jyly amerıkalyq Boeing kompanııasymen jalpy quny 15 mlrd AQSh dollary bolatyn 33 áýe kemesin jetkizý týraly kelisimder jasaldy. Atalǵan kelisimderge osy jyldyń aqpan aıynda Qazaqstan Prezıdentiniń AQSh-qa jumys sapary barysynda qol jetkizilgen bolatyn.
Vıtse-mınıstr tikeleı áýe qatynasyn iske qosý qazaqstandyq-amerıkalyq qatynastardy damytýdaǵy mańyzdy kezeńge aınalatynyn, iskerlik jáne týrıstik baılanystardy nyǵaıtýǵa, bıznes úshin jańa múmkindikter ashýǵa jáne Ortalyq Azııanyń Amerıka Qurama Shtattarymen kóliktik baılanysyn arttyrýǵa yqpal etetinin atap ótti.
Kezdesý sońynda taraptar tikeleı áýe qatynasyn iske qosý jáne azamattyq avıatsııa salasyndaǵy yntymaqtastyqty odan ári nyǵaıtý úshin qajetti praktıkalyq máselelerdi sheshý boıynsha syndarly dıalog pen birlesken jumysty jalǵastyrýǵa múddeli ekenin rastady.
Aıta keteıik, Qazaqstan men Maldıv araldary arasyndaǵy áýe reısteriniń sany eki ese artady.