Qazaqstan men AQSh arasynda ınvestıtsııalyq yntymaqtastyq keńeıip keledi

ASTANA. KAZINFORM – 2025 jyldyń qorytyndysy boıynsha Qazaqstan men AQSh arasyndaǵy taýar aınalymy 24,5%-ke tómendep, 3,2 mlrd AQSh dollaryn qurady. Bul týraly Ekonomıkalyq zertteýler ınstıtýty habarlady.

Eksport kólemi 47,7%-ke azaıyp, 1,03 mlrd AQSh dollaryna jetti. Al ımport 4,1%-ke qysqaryp, 2,2 mlrd AQSh dollaryn qurady.

Eksport qurylymynda shıki munaı – 361,4 mln dollar, ýran – 286 mln dollar, kúmis – 177,8 mln dollar, ferroqorytpalar – 110,6 mln dollar jáne tantal ónimderi – 20,2 mln dollar kóleminde tirkeldi.

Importta ushý apparattary – 293,6 mln dollar, jeńil avtokólikter – 267,3 mln dollar, týrboreaktıvti jáne týrbovıntti qozǵaltqyshtar – 192,7 mln dollar, dárilik zattar – 77,3 mln dollar jáne medıtsınalyq aspaptar – 57,7 mln dollardy qurady.

- Saýda kóleminiń tómendeýine qaramastan, ınvestıtsııalyq baǵyttaǵy ózara is-qımyl turaqty damyp keledi. 2015 jyldan bastap 2025 jyldyń toǵyz aıyna deıin AQSh-tan Qazaqstanǵa tartylǵan tikeleı sheteldik ınvestıtsııalar kólemi 28,9 mlrd dollarǵa jetti. Bul AQSh-tyń Qazaqstan úshin strategııalyq mańyzy bar ınvestıtsııalyq seriktes ekenin kórsetedi.

2025 jylǵy qarashada Prezıdent Qasym-Jomart Toqaevtyń AQSh-qa sapary barysynda «C5+1» formatynda Ortalyq Azııa elderi kóshbasshylarynyń sammıti ótti. Nátıjesinde ónerkásip, energetıka, medıtsına, tsıfrlandyrý, bilim berý jáne ınnovatsııa salalaryn qamtıtyn jalpy quny shamamen 17 mlrd dollar bolatyn 29 ekijaqty kelisimge qol qoıyldy, - delingen zertteýde.

Atap aıtqanda, Air Astana áýe kompanııasy úshin Boeing 787-9 ushaǵyn satyp alý, 1,1 mlrd dollarlyq volfram ken oryndaryn ıgerý, 2,5 mlrd dollar kólemindegi John Deere aýyl sharýashylyǵy tehnıkasyn óndirý jobasy, 1,3 mlrd dollarlyq jasandy ıntellekt jáne tsıfrlandyrý jobalary, shamamen 1 mlrd dollarlyq qarjylyq kelisimder, Samruk-Kazyna men Ashmore qatysýymen 150 mln dollarlyq medıtsınalyq klınıka qurý jáne AQSh aýmaǵynda 130 mln dollarlyq hımııalyq keshen salý jobalary bar.

Sonymen qatar AQSh Shyǵys pen Batysty baılanystyratyn Orta dálizdi damytýǵa erekshe nazar aýdaryp otyr. Bul baǵyt óńirlik ekonomıkalyq yntymaqtastyqty kúsheıtip, halyqaralyq saýda aǵyndaryn keńeıtýge múmkindik beredi.

Ekonomıkalyq zertteýler ınstıtýtynyń málimetinshe, Qazaqstan men AQSh arasyndaǵy áriptestik aldaǵy kezeńde tehnologııa, ınfraqurylym jáne kreatıvti ındýstrııa salalarynda da tereńdeı túsýi múmkin.

Aıta keteıik, Ulttyq ekonomıka mınıstrligi bes jylda jıyntyq ınvestıtsııa 400 mlrd AQSh dollaryna jetetinin málimdedi.