Qazaqstan men AQSh arasynda C5+1 sammıti aıasynda alǵashqy kelisimge qol qoıyldy
ASTANA. KAZINFORM – Qazaqstan Respýblıkasynyń Ulttyq banki men amerıkalyq Visa transulttyq kompanııasy aldaǵy «C5+1» sammıti jáne erteń Vashıngtonda ótetin «C5+1 onynshy mereıtoıy» bıznes-konferentsııasy aıasynda qol jetkizilgen Yntymaqtastyq týraly alǵashqy memorandýmǵa qol qoıdy, dep habarlaıdy Kazinform menshikti tilshisi.
Memorandýmǵa QR Ulttyq banki tóraǵasynyń orynbasary Aqyljan Baımaǵambetov jáne Visa kompanııasynyń aǵa vıtse-prezıdenti jáne memlekettik organdarmen baılanys jónindegi jahandyq jetekshisi Robert Tomson qol qoıdy.
Ulttyq bank ókiliniń atap ótýinshe, Visa kompanııasymen jasalǵan kelisimge tsıfrlyq qarjy ınfraqurylymyn damytý jáne Qazaqstan naryǵynda zamanaýı tsıfrlyq tólemderdi qoldanýdy keńeıtý maqsatynda qol qoıyldy.
– Memorandým eń jańa tólem tehnologııalary salasyndaǵy yntymaqtastyqty keńeıtýge jáne tólem naryǵynda jańa tsıfrlyq sheshimderdi synaqtan ótkizýge baǵyttalǵan. Negizgi baǵyttarǵa mynalar jatady: jańa sheshimderdi synaqtan ótkizý úshin Visa qoldaýymen ulttyq tólem korporatsııasy bazasynda quzyrettilik ortalyǵyn qurý; qarjy naryǵynda tsıfrlandyrý, bıometrııalyq sáıkestendirý júıeleri salasyndaǵy ozyq tájirıbelerdi taratý jáne tereńdetý;qarjy naryǵynda kıberqaýipsizdik pen alaıaqtyqtyń aldyn alý qyzmetin jetildirý, - dep habarlady Aqyljan Baımaǵambetov.
Robert Tomson Qazaqstan tarapymen Memorandýmǵa qol qoıylýyna qatysty túsinik berdi.
- Biz Qazaqstan Ulttyq bankimen sandyq aktıvter, kıberqaýipsizdik jáne saıahat jáne týrızm derekteri arqyly búkil el boıynsha sandyq ınnovatsııalardy jedeldetý týraly memorandýmǵa qol qoıǵanymyzǵa qýanyshtymyz. Bul shynymen de Qazaqstandy Ortalyq Azııadaǵy jetekshi sandyq ekonomıkalardyń birine aınaldyrýǵa kómektesedi, - dep málimdedi Robert Tomson.
Visa transulttyq kompanııasynyń basshysy elimizdegi jumys tájirıbesi týraly: «Osy jyldyń basynda Qazaqstanǵa kelgenim men úshin úlken qurmet boldy jáne Qazaqstan biz úshin tsıfrlyq tólemder salasynda jáne jańa tehnologııalarmen tájirıbe jasap jatqan isimizde shynymen de kóshbasshy, - dep atap ótti.
- Biz eldegi árbir adamnyń, shaǵyn bıznes, jeke tulǵalar nemese úkimet bolsyn, tsıfrlyq tehnologııalarǵa qol jetkizýin qamtamasyz etkimiz keledi. Al Qazaqstan shynymen de bul salada aldyńǵy qatarda. Sondyqtan biz álemniń tsıfrlyq tólemder turǵysynan qalaı damyp jatqanyn kórsetý úshin eń jaqsy tájirıbe retinde kóptegen ınnovatsııany engizip jatyrmyz, - dep baıandady Robert Tomson.
Buǵan deıin 6 qarasha kúni AQSh astanasynda «Ortalyq Azııa-AQSh» sammıti ótetinin jazǵan bolatynbyz. Henry Jackson Society taldaý ortalyǵynyń ǵylymı qyzmetkeri Darren Spınk Kazinform agenttiginiń menshikti tilshisine bergen suhbatynda S5+1 formaty keńeıýi múmkin ekenin atap ótti.