Qazaqstan men AEHA 2036 jylǵa deıingi yntymaqtastyqtyń Jol kartasyna qol qoıdy
ASTANA. KAZINFORM – Qazaqstan Respýblıkasy Atom energııasy jónindegi agenttiginiń tóraǵasy Almasadam Sátqalıev Qazaqstan Respýblıkasyna jumys sapary barysynda kelgen Atom energııasy jónindegi halyqaralyq agenttiktiń (AEHA) Bas dırektory Rafael Marı Grossımen kezdesý ótkizdi.
Kelissózder Qazaqstan men AEHA arasyndaǵy atom energııasyn beıbit maqsatta paıdalaný salasyndaǵy strategııalyq áriptestikti josparly damytý sheńberinde ótti. Taraptar ekijaqty yntymaqtastyqtyń qazirgi jaǵdaıy men perspektıvalaryn, Qazaqstan Respýblıkasynyń atom salasyn damytýdyń ózekti máselelerin, sondaı-aq ıadrolyq energetıka, ıadrolyq medıtsına, ǵylym jáne kadrlar daıarlaý salasyndaǵy birlesken bastamalardy iske asyrýdy talqylady.
Kezdesý qorytyndysy boıynsha 2036 jylǵa deıingi kezeńge Qazaqstan Respýblıkasy Atom energııasy agenttigi men AEHA arasyndaǵy yntymaqtastyqty tereńdetý jónindegi Jol kartasyna qol qoıyldy. Qujat eki tarap arasyndaǵy yntymaqtastyqtyń uzaq merzimdi basymdyqtaryn aıqyndaıdy jáne atom ónerkásibiniń negizgi baǵyttary boıynsha birlesken jobalardy is júzinde júzege asyrý úshin naqty negiz jasaıdy.
«Búgingi kezdesý – AEHA-nyń 69-sessııasy barysynda qol jetkizilgen kelisimderdiń jalǵasy. Sol kezde atom salasyndaǵy yntymaqtastyqty tereńdetýge arnalǵan Jol kartasyn ázirleý jáne oǵan qol qoıýǵa daıyndyq rastalǵan bolatyn. Búgin qol qoıylyp otyrǵan qujat ortaq kelisimderden naqty is-qımylǵa kóshýdi bildiredi jáne 2036 jylǵa deıingi kezeńge arnalǵan birlesken basym baǵyttardy júıeli túrde iske asyrýǵa negiz bolady», – dep atap ótti Almasadam Sátqalıev.
AEHA-men Jol kartasyna qol qoıý Qazaqstannyń AEHA standarttary men tásilderine sáıkes turaqty, qaýipsiz jáne zamanaýı atom salasyn qalyptastyrýǵa baǵyttalǵan dáıekti baǵytyn kórsetedi.
«Qazaqstan halyqaralyq qaýipsizdik standarttary men AEHA usynymdaryn qatań saqtaı otyryp, atom energetıkasyn damytýda jaýapty ári júıeli ustanym tanytyp keledi. Saıası qoldaý men qoǵam tarapynan kórsetilip otyrǵan senim eldiń ıadrolyq-energetıkalyq baǵdarlamasyn odan ári damytýǵa berik negiz qalyptastyrady», – dep atap ótti AEHA basshysy.
Qazaqstan AEHA-nyń beıbit atomdy damytý máselelerindegi negizgi halyqaralyq áriptes retindegi rólin joǵary baǵalaıdy. Sonymen qatar, uzaq merzimdi jáne júıeli negizde ózara is-qımyldy odan ári tereńdetýge beıildiligin rastaıdy.
Aıta keteıik, búgin Memleket basshysy MAGATE Bas dırektory Rafael Grossıdi qabyldady.
