Qazaqstan memorgandardyń shetelderge jiberetin keńesshiler sanyn ulǵaıtpaq
ASTANA. QazAqparat - Qazaqstan memlekettik organdardyń shetelderge jiberiletin keńesshiler sanyn ulǵaıtpaq. Bul týraly búgin Úkimettiń otyrysynda QR Syrtqy ister mınıstri Qaırat Ábdirahmanov aıtty, dep habarlaıdy QazAqparat tilshisi.
«Mınıstrlik Qazaqstannyń shetelderdegi qurmetti konsýldar ınstıtýtyn belsendi paıdalanady. Bul - ádettegideı óz elderindegi bedeldi bıznesmender. Instıtýt ózin shetelderde elimizdiń ekonomıkalyq múddelerin ilgeriletý jáne Qazaqstannyń shet memlekettermen saýda-ekonomıkalyq qatynastaryn bekitý úshin tıimdi qural retinde tanytty», - dedi Qaırat Ábdirahmanov.
Osy rette ol Qazaqstannyń shetelderdegi mekemeleriniń ekonomıkalyq baǵyttaǵy qyzmetin kúsheıtý boıynsha jumysy jalǵasyp jatqanyn aıtty.
«Elimizdiń jańa syrtqy saıası-ekonomıkalyq basymdyqtaryn jáne el basshylary qoıǵan mindetterdi eskere otyryp, Syrtqy ister mınıstrligi qazirgi bar sannyń aıasynda Úkimettiń ekonomıkalyq blogynyń memlekettik organdarynan Qazaqstannyń sheteldegi dıplomatııalyq ókildikterine issaparǵa jiberilgen ókilderin qaıta bólý qajettiliginiń ýaqyty keldi dep esepteıdi. Tıisti usynys Úkimetke engizildi. Іshki nusqaýlarǵa sáıkes, Investıtsııalar jáne damý mınıstrliginiń 10 basym eldegi ınvestıtsııalar jónindegi keńesshilerine qosymsha Ulttyq ekonomıka mınıstrliginiń saýda saıasaty jónindegi keńesshilerin jiberý úshin geografııasyn keńeıtý máseleleri pysyqtalýda. Aýyl sharýashylyǵy kesheni máseleleri jónindegi keńesshiler ınstıtýty júıesin keńeıtý máselesin de qarastyryp jatyrmyz», - dedi mınıstr.
