Qazaqstan memlekettik jańǵyrý kezeńin aıaqtaýǵa jaqyn — grýzııalyq sarapshy

ASTANA. KAZINFORM — Sarapshylardyń pikirinshe, 15 naýryzda ótetin Konstıtýtsııaǵa ózgerister engizý jónindegi referendým eldegi saıası reformalardy jalǵastyrý men memlekettik júıeni jańǵyrtýdyń mańyzdy kezeńi sanalady.

Grýzııalyq saıası sarapshy Gela Vasadze Kazinform tilshisine bergen suhbatynda Qazaqstan qazirgi tańda damýdyń mańyzdy belesinen ótip jatqanyn atap ótti. Ol bul kezeńdi zamanaýı ulttyq memleketti qalyptastyrýdyń sheshýshi kezeńi dep baǵalady.

Vasadze reformalardyń bılik tarmaqtarynyń teńgerimin arttyrý, qoǵamdaǵy jańǵyrý talabyn qanaǵattandyrý úshin jáne halyqaralyq ahýaldyń jyldam ózgerýine jaýap retinde jasalyp otyrǵanyn atap ótti. Ol usynylyp otyrǵan saıası jáne konstıtýtsııalyq ózgeristerdi qısyndy ári ýaqytyly qadam dep sanaıdy.

— Shyn máninde, bul memlekettik ınstıtýttardy jańa jaǵdaıǵa beıimdeý. El bir mezgilde ishki turaqtylyqty saqtap, belsendi syrtqy saıasat júrgizýge daıyn bolýy kerek, — dedi sarapshy.

Sarapshy reformalardyń halyqaralyq tájirıbege saı ekenin de atap ótti. Onyń aıtýynsha, Konstıtýtsııalyq damýdyń bir ǵana ámbebap úlgisi joq, ár memleket óz damý jolynan ótedi.

— Ár memleket óziniń ınstıtýtsıonaldyq damý jolynan ótedi. Qazaqstandaǵy ózgerister memlekettik ınstıtýttardyń turaqtylyǵyn nyǵaıtýǵa, ókilettikterdi qaıta bólýge jáne bılik júıesin teńgerimdi etýge baǵyttalǵan, bul álemdik saıası modernızatsııa tájirıbesine sáıkes keledi, — dedi ol.

Sarapshy reformalardy halyqaralyq baǵalaý mánine de toqtaldy. Qazaqstan Ortalyq Azııadaǵy eń iri ekonomıka jáne Eýropa men Azııa arasyndaǵy mańyzdy tranzıttik memleket bolyp qana qoımaı, aımaqtyq turaqtylyqqa da tikeleı yqpal etedi. Sol sebepti basqarýdy jetildirýge jáne memlekettiń turaqtylyǵyn arttyrýǵa baǵyttalǵan reformalar tek ishki damý úshin emes, búkil aımaqtyq yntymaqtastyq pen qaýipsizdikke de áser etedi.

— Halyqaralyq seriktester men kórshiler Qazaqstandy ekonomıkalyq, kólik, energetıkalyq jáne saıası máselelerdi sheshetin senimdi memleket retinde baǵalaıdy. Instıtýtsıonaldyq jańǵyrý qanshalyqty sátti júzege assa, eldiń ózi de, búkil aımaqtyq qaýipsizdik pen yntymaqtastyq júıesi de soǵurlym myqty bolady, — dep túıindedi sarapshy.

Esterińizge sala keteıik, 2026 jylǵy 12 aqpanda Qazaqstan Respýblıkasy jańa Konstıtýtsııasynyń qorytyndy jobasy jarııalandy.

Jańa Konstıtýtsııa boıynsha referendým Qazaqstanda 15 naýryzda ótedi.