Qazaqstan memlekettik basqarý júıesin tereń transformatsııalaýǵa bet aldy – ózbekstandyq sarapshy

TAShKENT. KAZINFORM – Qazaqstan memlekettik basqarý júıesin tereń transformatsııalaýǵa bet aldy. Mundaı pikirdi Ózbekstan Strategııalyq reformalar agenttigi dırektorynyń birinshi orynbasary Abdýlla Abdýkadırov bildirdi, dep habarlaıdy Kazinform agenttiginiń menshikti tilshisi.

- Biz Qazaqstanda bolyp jatqan saıası oqıǵalardy muqııat qadaǵalap otyramyz. Prezıdent Qasym-Jomart Toqaevtyń keıingi bastamalary kópshiliktiń, onyń ishinde halyqaralyq qaýymdastyqtyń nazaryn aýdardy. Vıtse-prezıdent ınstıtýtyn engizý, joǵary laýazymdarǵa taǵaıyndalatyn sheneýnikterdiń kandıdatýrasyn Parlamentpen kelisý sııaqty usynystar Qazaqstannyń memlekettik basqarý júıesin tereń transformatsııalaýǵa bet alǵanyn aıǵaqtaıdy. Bul baǵytta áli naqtylaýdy qajet etetin máseleler bar. Atap aıtqanda, vıtse-prezıdenttiń mindeti men qyzmet baǵyty áli aıqyndalyp jatyr, - dedi Abdýlla Abdýkadırov.

Munymen birge, ol Prezıdenttiń Halyq Keńesin qurý bastamasyna qatysty pikir bildirdi. Abdýlla Abdýkadırovtiń pikirine saı, zańdy kúshke ıe bolatyn atalǵan organ bılik pen buqara arasyndaǵy kópir qyzmetin atqarady.

- Halyq Keńesi dep atalatyn yqpaldy konsýltatıvtik organ pikir almasý alańyna aınalaryna senimdimin. Onyń quramynda tájirıbeli sarapshylardyń bolýy mańyzdy. Osy arqyly Parlament sala mamandarynyń pikirine qulaq asyp, mańyzdy máselelerdi ýaqyt kúttirmeı sheshe alady. Bul búkil ult ókilderiniń basyn biriktiretin jáne ashyq oı aıtylyp, naqty usynys ázirlenetin alań bolmaq, - dep túıindedi Abdýlla Abdýkadırov.

Eske salaıyq, buǵan deıin Qazaqstandaǵy konstıtýtsııalyq reformalar týraly eýropalyq sarapshylar pikir bildirgen bolatyn.