Qazaqstan memlekettik tildi oqytý ortalyqtaryn Ulybrıtanııanyń «British council» konsýldyǵymen birge damytady - D. Myńbaı
ASTANA. 26 qyrkúıek. QazAqparat - QR Mádenıet jáne aqparat mınıstrligi tildi oqytý ortalyqtaryn damytýda Ulybrıtanııanyń «British council» konsýldyǵynyń tájirıbesin qoldanbaq.
Bul týraly búgin Astanada «Til - tatýlyq tiregi» atty respýblıkalyq forýmda atalǵan vedomstvo basshysy Darhan Myńbaı málim etti.
Onyń aıtýynsha, kez kelgen adam atalmysh birlesken oqytý baǵdarlamasy boıynsha ǵalamtor arqyly onlaın rejiminde memlekettik tildi úırene alatyn bolady.
«Mınıstrlik aldaǵy ýaqytta tildi oqytý ortalyqtaryn akkredıtteý, ıaǵnı zamanaýı bir standartqa negizdelýin iske asyrmaq. Osy maqsatta halyqaralyq tájirıbesi bar «British council» konsýlymen jumys júrgizilýde. Onlaın rejimi arqyly qashyqtyqtan oqytýǵa qol jetkizý maqsatynda 2013-2020 jyldarǵa arnalǵan qazaq tilin oqytýdyń onlaın júıesin qurý jáne engizý jobasy ázirlenýde. ıAǵnı, bunyń barlyǵy qoljetimdi bolady. Memlekettik tildi ınternet arqyly úırenýge de jaǵdaı jasaýymyz kerek», - dep atap kórsetti ol.
Mınıstrdiń habarlaǵanyndaı, Qazaqstanda 130 oqytý ortalyǵy bar. Olardyń 57-si memlekettik, 73-i jeke menshik ortalyq.
Memlekettik tilde erkin sóıleıtin ózge ult ókilderi arasynda ótip jatqan forýmǵa elimizdiń túkpir-túkpirinen 150-ge jýyq qatysýshy kelgen. Shara aıasynda dóńgelek ústel men oqytý ortalyqtarynyń kórmesi ótýde.
