Qazaqstan memlekettik rámizderiniń avtorlary kim
ALMATY. QazAqparat- Memlekettik rámizder – eldiń táýelsizdiginiń belgisi. Rámizder táýelsizdik nyshany retinde erekshe baǵalanyp, bıik mártebege ıe. Almaty qalasynyń memlekettik arhıvinde qandaı qujattar saqtaldy jáne Memlekettik rámizderdiń avtory kimder? Bul saýaldarǵa QazAqparat tilshisi jaýap izdep kórdi.
Almaty qalasynyń memlekettik arhıviniń jeke qorlar, aýdıovızýaldy jáne sýrettik qujattardy jınaqtaý bóliminiń basshysy Gúlnar Ismaılovanyń aıtýynsha, ár azamat memlekettik rámizderdi qasterleýge mindetteledi jáne olar zańmen qorǵalady.
Qazaqstan egemendik alǵannan keıin, 1992 jyly respýblıkalyq rámizderge baıqaý jarııalandy.
Baıqaý nátıjesinde ánurannyń avtorlary: QR memlekettik syılyǵynyń ıegerleri, aqyn - Qadyr Myrzalıev, Jadyra Dáribaeva, Muzafar Álimbaev, Tumanbaı Moldaǵalıev, týdyń avtory Sháken Nııazbekov, eltańba avtorlary Shota Ýálıhanov pen Jandarbek Málibekov baıqaý qorytyndysynda jeńiske jetti.
Rámizderdiń avtory - jeti adam. Onyń tórteýiniń qujaty Almaty qalasy memlekettik arhıvine saqtaýǵa qabyldanǵan.
– Qadyr Myrzalıev – aqyn, Qazaqstannyń halyq jazýshysy, aýdarmashy, Memlekettik syılyqtyń laýreaty, QR alǵashqy ánuranynyń sózin jazǵan avtorlardyń biri.
«Qujattardy arhıvke 2018 jyly aqynnyń jubaıy ótkizdi. 700-deı qujat. Jeke qujattary, shyǵarmalary, óleńder jınaǵy, dramalary, aýdarmalary, naqyl sózderi, prozalary, tolǵaýlary, pikirleri, suhbattary, marapattary, kitaptary, quttyqtaý qaǵazdary arhıvte saqtaýly. 1892-2010 jyldar aralyǵyn quraıdy»,- deıdi arhıv qyzmetkeri.
Qadyr Myrzalıev 2011 jyldyń 24 qańtarynda ómirden ótti.
– Sháken Nııazbekov - sýretshi, Qazaqstannyń eńbek sińirgen qaıratkeri, QR Memlekettik Týynyń avtory. Arhıvte Sháken Nııazbekovtiń jeke qujattary, óner týyndylary, alǵys hattary, quttyqtaýlary, syıǵa berilgen kitaptary, týdyń túpnusqasy, Memlekettik rámizderdi daıyndaý jobalary jáne baǵdarlamalary, sýrettik qujattary saqtalǵan.
Sháken Nııazbekov 2014 jyldyń 16 tamyzynda ómirden ótti.
– Kúljadyra Dáribaeva - aqyn, Qazaqstan Respýblıkasy jazýshylar odaǵynyń múshesi, Qazaqstan Respýblıkasynyń Memlekettik alǵashqy ánuran avtorlarynyń biri.
Kúljadyra Ibragımqyzynyń 2011 jyly 1965-2011 jyldar aralyǵyn qamtıtyn jeke qujattary men qoljazbalary, avtorlyq kitaptary, baspasóz betterinde jarııalanǵan maqalalary, sýretteri arhıvke ótkizildi.
– Muzafar Álimbaev- Qazaqstannyń halyq jazýshysy, Memlekettik syılyǵynyń laýreaty, qazaq ádebıetinde soǵys surapylyn bastan keship kelgen qalamger shoǵyrynyń biri.
Muzafar Álimbaevtyń qujattaryn arhıvke 2021 jyly balalary ótkizdi. Onyń qujattary arhıvte qurylǵan áleýettik qordyń qatarynda.
Qujattary qazirgi ýaqytta óńdelý ústinde. Qujattardyń quramynda dańqty batyr B.Momyshulynyń 1973 jyly M.Álimbaevtyń 50 jyldyq mereıtoıyna arnap jazǵan óleń joldary (arhıv qorynyń qundy qujattarynyń quramyna jatqyzýǵa bolady), sýretteri (uly tulǵamyz Dinmuhamed Qonaev, Elbasymyz Nursultan Nazarbaev, áıgili sýretshi Aısha Ǵalymbaevamen túsken sýretteri), shyǵarmalary, qoljazbalary, avtorlyq kitaptary bar.
Muzafar Álimbaev 2017 jyly 27 qarashada ómirden ótti.
Spıkerdiń aıtýynsha, táýelsizdiktiń úlgisi bolǵan Egemen Qazaqstannyń alǵashqy ánuranynyń avtorlary Qadyr Myrzalıev, Jadyra Dáribaeva, Muzafar Álimbaev jáne Memlekettik týymyzdyń avtory Sháken Nııazbekovtyń qujattary arhıv maqtanyshyna aınalǵan.
«Rámiz avtorlarynyń ómiri men qyzmeti kemel urpaqqa ónege, úlgi. Sondaı tulǵalardyń qujattaryn saqtaý jáne nasıhattaý bizdiń paryzymyz. Memlekettik rámizder kúni qutty bolsyn, Táýelsizdigimiz tuǵyrly bolsyn, Kók Týymyz árqashanda bıikterden jelbireı bersin»,- deıdi Gúlnar Ismaılova.
