Qazaqstan memlekettik qyzmettiń ınnovatsııalyq modelin engizip jatyr - Aıgúl Shaıymova
«Jahandaný dáýirinde kóshbasshylyqtyń róli - kez kelgen memlekettiń kún tártibindegi ózekti másele. Sońǵy 20 jylda osy ınstıtýttyń damý vektory álemde týyndaǵan syn-qaterlerdiń yqpalymen ózgeriske ushyrady. Biraq bazalyq komponentter - adamdardy mıssııa men maqsattarǵa jetkizý qabileti, jaýapkershilikti qabyldaý - ózgerissiz qalady», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova AEF aıasynda ótken «Jahandyq konferentsııa: Ózgeriske ushyraǵan álemdegi tranformatsııalyq kóshbasshylyq» sessııasy barysynda.
Onyń aıtýynsha, qazir bul sıpattamalarǵa: ózgeristerge jyldam beıimdelý, senim negizinde komandamen qarym-qatynas jasaý, «qatelesý quqyǵynyń berilýi» jáne jeke mysalmen motıvatsııa berý amaldary qosylǵan. Tarıh sahnasynda óz memleketterin nemese uıymdaryn qıyn kezeńde tabys traektorııasyna shyǵara alǵan kóshbasshylar az emes.
«Búgin biz osynaý tamasha qalanyń tamasha zalynda turmyz. Munda kez kelgen máseleni ashyq ári tynysh talqylaýǵa jol ashyq. Bul da - el basqarýshylarynyń kóshbasshylyǵynyń nátıjesi. Biz oǵan Tuńǵysh Prezıdenttiń saıası erik-jigeriniń arqasynda qol jetkizdik», - dep atap ótti agenttik tóraǵasynyń orynbasary.
Onyń aıtýynsha, aldaǵy jahandyq trendterdi boljap bile otyryp, Elbasy qoǵamǵa qyzmet etýi tıis memlekettik basqarýdyń jańa túrine kóshý mindetin qoıǵan.
«Bul úshin aldyńǵy qatarly elderdiń tájirıbesine súıene otyryp, memlekettik qyzmettiń ınnovatsııalyq modelin engizemiz», - dedi Aıgúl Shaıymova.
Jańa modelge qandaı sıpattamalar tán? Birinshi kezekte kórsetkishter sońyndaǵy báıgeni toqtata turyp, naqty nátıjelerge qol jetkizýge tyrysý kerek.
«HH ǵasyrdyń basynda mynadaı pikir paıda boldy: «Eń negizgi iritki salýshy - zulymdyq esepter, statıstıka jáne shamadan tys baqylaý». Kórip otyrǵanymyzdaı, 100 jyl ótti. Al bul sıpattama áli de, ásirese, birqatar elderdiń memlekettik sektorynda kórinis tabady», - deıdi ol.
Ekinshi - jumystyń serpinin, utqyrlyǵyn jáne shyǵarmashylyq tásilin qamtamasyz etý úshin sheshim qabyldaý jedeldigi.
«Osydan birshama máselelerdiń týyndaıtyny ótirik emes. Sebebi kúrdeli ıerarhııa men jaýapkershilikti ózine alǵysy kelmeý sekildi minez-qulyq jeke uıymdardyń korporatıvtik mádenıetinde saqtalady. Qazir elimizde aýqymdy ońtaılandyrý úderisteri bastalyp ketti. Nátıjesinde bıýrokratııany alyp tastaý jáne «bastamashyny jazalaý» stereotıpterin joıý kútilýde. Ol Qazaqstanda jeke jobalar boıynsha qoldanylyp keledi. Osylaısha, pılottyq rejimde eńbekaqy tóleýdiń jańa júıesi iske asyrylady», - dep túsindirdi Aıgúl Shaıymova.
Úshinshi sıpattama - yntymaqtastyq qaǵıdaty boıynsha jumys júrgizý. Uıymdar pikir almasý men ıdeıalardy, ujymdyq talqylaýdy kótermeleýi tıis.
«Biz ol júıege kóshý úshin qandaı sharalardy qoldandyq? 20 jyl boıy úzdik sheteldik tájirıbe úlgisinde memlekettik basqarý júıesi elimizde jańǵyrtylyp keledi. Ortalyqsyzdandyrý jáne jekeshelendirý jolymen ıerarhııalyq qurylym qysqartyldy. Strategııalyq josparlaý, jergilikti ózin-ózi basqarý jáne memlekettik qyzmetter ınstıtýttary engizildi. IT-ınfraqurylym damýda, «Azamattarǵa arnalǵan úkimet» quryldy», - dep atap ótti Aıgúl Shaıymova.
